Renobacion edificio biblioteca San Nicolas

Desafortunadamente bibloteca San Nicolas su edificio a bay hopi atras durante ultimo añanan y awor gobierno ta anuncia cu ta bay cuminsa cu su renobacion. Minister di Enseñansa, sra. Michelle Hooyboer-Winklaar, durante un conferencia di prensa a splica e motibo pa drecha e edificio.

Durante un encuentro cu prensa ayera, e mandatario a splica cu e edificio di Biblioteca San Nicolas, cu ta un edificio di mas of menos 27 aña (bieu) y den un estado bastante decai. Ta asina cu na aña 2007 ya a haci un renobacion na e edificio, incluso e parti di verf exterior, pero manera cu por a nota obviamente esaki no tabata algo duradero y a pone cu e necesidad pa un renobacion a surgi atrobe. E servicio di biblioteca San Nicolas no tabata optimal pa basta tempo pa motibo di e diferente problema cu e infrastructura di e edificio.

E edificio no tabata riba lista di renobacion di gobierno. Tin un lista bastante largo di diferente scol cu ta wardando un renobacion, 84 scol cu casi 70% di eseynan ta edificionan cu a wordo construi 40 te cu 60 aña pasa. E edificio di biblioteca no ta asina bieu, pero tog un renobacion ta hopi urgente. Parti paden tin hopi caminda cu mester reparacion of renobacion, manera e instalacion di airco, lift, lekmento diferente caminda y otro trabounan. “Ta asina cu a delibera entre e ministernan pa wak con ta yega na e fondonan pa por renoba esaki. Un biblioteca ta un centro comunitario hopi importante pa un pueblo. Pa hoben, adulto y mucha. Tin e aspecto di enseñansa y un biblioteca ta un centro cu personanan ta bay pa topa y combersa y e ta un lugar di siña, explora y stimula pa e imaginacion crece. Ministernan a pone cabes hunto y a yega na un solucion pa yega na e fondonan necesario pa por renoba e edificio aki”, asina e mandatario a splica. 





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn