‘A twenty mile walk’ 3 documentario cortico encuanto Herencia Cultural Inmaterial

Fundacion Herencia Cultural Inmaterial a ricibi 3 documentario cu ta duna un bista riba custumber, tradicion y expresionnan cultural. Ta trata un documentario di Dande titula ‘Dande, House to House, Festival to Festival’encuanto e nificacion y origin di Dande y con e ta biba bou miembronan di e comunidad Arubano. Otro documentario ta trata Remedi tera y Curandero y tin e titulo ‘Backyard Medicine : in search of Aruban Healers’. E di tres documentario ta encuanto ritual y custumber di entiero y yama ‘In Living Memory: Funeral Customs in Aruba’. E serie completo ta carga e titulo ‘A twenty mile walk’  y nan lo wordo presenta durante encuentronan informativo cu Fundacion Herencia Cultural Inmaterial ta bay organisa.

Produccion pa e documentarionan tabata den man di Stichting Filmtent den persona di Patrick Thompson hunto cu Nelson Gonzalez, artista visual contemporaneo y tambe Andre LeGrand. E instancia cu a pidi y a finansia e produccionnan aki ta e comision nacional di Aruba pa Unesco.

Fundacion Herencia Cultural Inmaterial

Na aña 2012 Reino Hulandes a ratifica e tratado di UNESCO pa salvaguardia herencia cultural inmaterial y esaki a drenta na vigor na augustus 2012. E ta trata tradicion y expresionnan oral, incluyendo idioma como vehiculo di herencia cultural inmaterial, arte escenico, ritual y evento festivo, conocemento y practica di naturalesa y e universo y tambe artesania tradicional. E tratado aki ta vigente den henter Reino Hulandes. Gobierno di Aruba a encarga Fundacion Herencia Cultural Inmaterial cu e implementacion di e tratado aki. E fundacion a cuminsa su actividadnan medio 2013.

Fundacion Herencia Cultural Inmaterial ta cuminsa cu e Inventario Nacional di Herencia Cultural Inmaterial. Esaki ta un di e obligacionnan di e tratado di Unesco cu un pais mester cumpli cu ne. Ta traha e inventario nacional hunto cu e diferente gruponan cultural den comunidad. Gruponan mes por nomina nan tradicion of expresion cultural pa e Inventario Nacional di Aruba. Pa mas informacion encuanto e inventario nacional por tuma contacto cu Gina Jie Sam Foek na Biblioteca Nacional Aruba, tel. 582 1580.

Kico ta e metanan di Fundacion Herencia Cultural Inmaterial?

  • salvaguardia herencia cultural inmaterial na Aruba
  • engrandece respet pa herencia cultural inmaterial di tur grupo, comunidad y individual na Aruba
  • Pa informa comunidad di e importancia di herencia cultural inmaterial
  • Pa traha riba cooperacion riba nivel nacional y internacional

Pakico salvaguardia?

Rond mundo ta experencia e preocupacion cu pa motibo di globalisacion y otro desaroyonan den e comunidad moderno cierto elementonan cultural por bay perdi. Expresionnan cultural cu ta hopi fragil pero importante.

Kico ta un inventario nacional?

Cu un inventario nacional e fundacion kier identifica tur expresion cultural cu ta biba riba nos isla. A base di e inventarisacion ta determina pa cua expresion cultural tin un urgencia pa un plan di salvaguardia.

Con ta haci esaki?

Na prome lugar, hunto. Y ken ta tuma iniciativa? E gruponan of personanan cu ta sinti cu nan tradicion of expresion mester ta riba e inventario nacional. E comunidad completo tin cu participa na salvaguardia herencia cultural inmaterial.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn