“In situ”

Ta e serie di publicacion nobo di Museo Arqueologico Nacional

Ya ta casi 35 aña pasa cu Museo Arqueologico Aruba a habri su porta pa publico pa promer biaha den e edificio monumental na Zoutmanstraat 1. Un di e tareanan principal di e Museo, defini desde su apertura na 1981 caba, ta pa promove e balioso herencia arqueologico di nos isla.

Pa medio di su exposicion permanente, exposicionnan temporario y publicacionnan, Museo Arqueologico a ehecuta e tarea aki na un manera hopi varia. Na 1989 a lanza e serie di publicacion ‘Publicacion di Museo Arqueologico Aruba’ cu ya ta conta cu 12 produccion tanto na papiamento, ingles, hulandes y spaño. Contenido di e bukinan aki ta varia di reportenan di investigacionnan cientifico te na bukinan dirigi specificamente riba mucha. Cu apertura di Museo den e antiguo edificionan monumental di famia Ecury na 2009 a adapta e nomber di e serie aki di acuerdo cu esun di Museo esta ‘Publicacion di Museo Arqueologico Nacional Aruba’. E serie aki a ricibi hopi elogio den transcurso di aña, specialmente di e mundo academico local y regional. Actualmente ta asina cu Museo tin un ‘wachtlijst’ di peticion di academiconan interesa pa publica nan manuscrito den e serie aki. Museo tambe ta trahando riba un edicion nobo cu e topico di e dibuhonan Indjan riba baranca, planea pa ser publica na final di 2016.

Na aña 2009 a dicidi di cuminsa un serie nobo den forma di un ‘scientific journal’.  A titula e serie aki ‘Ceque’, e palabra Caquetio pa ‘shoco’ y su prome edicion, cual ta un compilacion di historia di Aruba, a ‘sold out’.  E di 2 edicion ta conta e storia di ‘Hero’, un brik cu a sink dilanti costa norte di Aruba na 1886 y na cual topico Museo a dedica un exposicion temporario tambe. Number 3 den e serie di ‘Ceque’ lo trata e estudio di material di cocolishi y ta den produccion e aña aki.

Pa yega ainda mas cerca di comunidad  y hasiendo uso di posibilidadnan di e Era digital, Museo Arqueologico lo lanza un serie di publicacion nobo bou di e nomber ‘In situ’, dirigi specialmente riba studiante y profesionalnan hoben.  E nomber ta un adverbo latin cu kiermeen ‘na su lugar original’ of ‘na su lugar’. Ta asina cu pa arqueologonan y otro cientificonan manera e.o. biologonan, ta di gran valor pa por studia algo ‘in situ’ pues den su contexto orginal. E serie aki lo ta den forma di ‘folders’ numera y cu un contenido accesibel pa un publico grandi y varia. E prome edicion di ‘In situ’ lo ta na papiamento y ingles y lo tin como topico e prome resultadonan di investigacion na e sitio arkeologico di Santa Cruz 35. Lo imprimi un cantidad limita ya cu Museo  ta trahando duro pa sigura cu lo pone e serie nobo aki disponibel pa un y tur por ‘download’ riba un plataforma virtual proximamente.

E serienan di publicacion di Museo Arqueologico ta posibel danki na e sosten balioso cu a haya den pasado di e.o. UNOCA y awor pa e promer edicion di ‘In situ’, di ‘Fundacion 1403’ y di e proyecto financia pa Conseho di Investigacion di Union Europeo, ‘NEXUS 1492’. Diahuebs dia 3 di maart venidero a lansa e serie nobo aki durante un Café Cultural na Museo Arqueologico Nacional.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn