“Wereldomroep”: motor tras di literatura Caribense

~~Jos de Roo lo duna un charla diaranson 29 di october pa 8or di anochi na Bibioteca Nacional Aruba, seccion Arubiona/Caribiana, Bachstraat 5, tocante

Wereldomroep: gangmaker van Caribische literatuur
“Wereldomroep”: motor tras di literatura Caribense

Na añanan 1947 te 1958 “Wereldomroep” tawata e instancia principal cu tawata duna encargo na autor Antiano y Surnameño. Cu casi 300 contribucion el a publica mas cu cualkier otro revista di e tempo ey. Mayoria di nan te na e momento aki tawata desconoci. Esey a resulta di e investigacion riba cua Jos de Roo a promove na Universidad di Amsterdam na september ultimo.  El a descubri cu e, e tempo ey, futuro dokter Arubiano Hubert Dennert y e linguista Curasoleño Raúl Römer a skirbi storia. Pa escritornan manera Boeli van Leeuwen y Jules de Palm nan storianan pa “Wereldomroep” tawata determinante pa nan desaroyo mas leu. Pa Frank Martinus Arion el a representa e fase den cua e tawata idealisa Hulanda. “Wereldomroep” a resulta pues di ta un berdadero motor tras di literatura Caribense.

E maneho di sr. J. van de Walle, na cabes di e seccion di West-India (Caribe), tawata innovativo y pionero. Den e di dos mita di añanan sesenta numa su vision anticolonial  pa baloracion di loke ta propio y e idiomanan propio a haya aceptacion general. El a laga graba literatura di pasado, locual a resulta den e coleccion mas grandi di literatura oral di teritorio Hulandes Caribense. Cu su encargonan el a construi literatura Antiano y Surnameño na manera moderno y door di esey esakinan a bira rico na tema tipico di migrante. E tawata apoya nacionalismo cultural y politico. El a dedica atencion na desaroyo literario den region Caribense. Y finalmente el a duna tur espacio na e idiomanan di pueblo.

Den su charla Wereldomroep: gangmaker van Caribische literatuur Jos de Roo ta conta di su descubrimentonan, cu na momento di su promocion a wordo yama pionero y innovativo. E lo elabora en particular riba e temananan tipico di migrante, cu den storia di “Wereldomroep” a aparece pa prome biaha. E tempo ey caba un punto di discusion tawata si na Hulanda mester a integra of no. Pero e imagen cu a duna di Hulanda y e Hulandesnan ta hopi diferente cu esun di awor.

E charla lo tuma luga diaranson 29 di october 8 or di anochi na Biblioteca Nacional, seccion Arubiana/Caribiana, Bachstraat 5. Tur hende ta cordialmente bonbini na e charla aki. Entrada ta gratis.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn