10 idea pa stimula lesamento durante vakantie!

“10 idea pa stimula lesamento durante vakantie!”

Ningun plan pa bay biaha e vakantie aki? Ata algun idea pa yudabo y bo famia sali bai keiro, cu ayudo di algun bon buki, naturalmente.

  • Lesa un buki cu ta siñabo mas di bo propio pais.

Experencia mas di bo pais cu ayudo di bon buki y otro material. Coi un atlas di mundo of e globo si bo tin un. Wak na unda, band’i unda, leu di unda, bo pais ta keda. Cu un mapa di bo pais, bo por combersa tocante e lugarnan cu abo y bo yiu a bishita caba y esunnan cu boso lo kier bishita un dia. Usa Internet of Biblioteca Nacional Aruba pa siña mas di e lugarnan aki. Lesando tocante e Parke Nacional Arikok, lugarnan historico y museo bo por rebiba bo pais pa bo famia. 

  • Bishita un museo local.

Museonan local semper ta keda un destinacion popular pa turista. Pakico no pa e localnan mes? Pa drenta den e ambiente di cualkier museo, bo por laga bo yiu lesa un buki cu tin di haber cu e coleccion di e museo cu e ta bai bishita. P.e. si e ta bai Museo Archeologico, e por lesa buki tocante indjan. Na e museo e por puntra e guia, cua buki nan ta recomenda p’e lesa tocante e topico ei. Asina bo yiu ta saca mas ainda di su paseo.

  • Bishita un lugar historico.

Tin un lugar historico cu abo y bo famia no a bishita ainda? Por busca informacion na e museonan local, Parke of Biblioteca. Nan tambe por dunabo informacion di buki y material obtenibel tocante e historia y e lugarnan historico di bo pais. Haci manera esaki ta un aventura cu abo y bo famia ta bai explora. 

  • Planea un dia pa diberti of relaha.

Vakantie no ta vakantie si bo no tuma algun dia pa relaha y disfruta di bida. Bai lama, haci un picnic den aire liber of bai campa. Laga henter e famia skohe un buki, un revista, un corant, kico cu nan ta prefera pa lesa y regala nan esei. Basta cu ta algo pa lesa. Comparti cu otro boso pensamento y opinion: “e buki aki ta laf!” “Tende esaki!” “Boso tabata sa cu…”  “Ken por rei…”

  • Disfruta di nos medio ambiente.

Ki mihor ocasion cu un vakantie pa bai dal un bon cana, observa mata y bestia, disfruta di e bida di pafo. Asta si bo no ta sali bai un caminda, bo por disfruta di tur locual naturalesa tin di ofrece serca di bo cas. Tin un parke of un pida naturalesa den bo becindario? Sali bon prepara cu suficiente awa y algo di pasaboca (no mucho pisa), sapato comfortabel y paña fresco. Bai cu buki di parha, di otro bestia local of buki di mata, un verrekijker y vergrootglas tambe por yuda. Observa kico tur tin rond di bo, lesa, siña y conoce. 

  • Un atardi di contamento di storia.

Ya cu den vakantie bo ta mayoria biaha pafo, haci algo special pabo y bo famia. Haci un kampvuur, sea den cura of un caminda cu e ta permiti. Pa pasaboca, cada un di boso por pega Sunchi (Marshmallows) na un pida palo largo y pone nan tosta un tiki den candela. Cada un mester conta un storia chikito (10 minut?) - sea inventa, lesa of scucha - pa entretene e otronan. Duna otro chens pa pensa ki storia nan ta bai conta. Por prepara tur hende di trempan, asina nan por bai busca inspiracion. 

  • Haci un biahe pa e streanan.

Pa algun hende, vakantie kiermen keda pafo te lat y observa e streanan. Si bo por drumi pafo den bo cura, busca un matras of hamaca, wak ariba y conta otro storia te ora soño yega. Ken a wak un strea cai? E ta cai di berdad? Unda e ta bai? Tambe por busca informacion adelanta tocante planeta, strea, luna, cometa. Tin hopi buki di e topico aki. Lesa y descubri e universo hunto.

  • Conta storia di tur parti mundo den bos halto.

Planea un atardi di contamento di storia den bos halto. Si bo tin yiu mas chikito, e ora ta abo ta esun cu ta lesando mas tanto. Si bo tin yiu mas grandi, henter e famia por participa. Ki mihor manera pa bai biaha tur rond di mundo cu un seleccion di leyendanan di diferente pais. Laga bo yiu skohe e storia cu e kier lesa. Si e tin un pais di preferencia, bo por yud’e haña e buki adecua y na su nivel. Corda: e idea ta, pa pasa bon! 

  • Biaha bai den tempo.

Laga bo rutina di tur dia para un rato y lesa un buki tocante biahamento den tempo hunto cu bo yiu. Por pidi Biblioteca Nacional pa sugerencia tocante e topico. Pa finalisa e proyecto aki, traha un capsula di tempo. Pa traha e capsula aki, bo mester algo fuerte pa proteha e contenido, p.e. un bleki di lechi cu ta sera bon, bleki di verf… Laga bo yiu skohe e material cu e kier pone den su capsula. Idea: un corant, pintura, buki, potret. Delibera hunto pa ken e capsula aki ta bai ta (e por ta pa bo yiu aki 10 aña, pa un desconoci den un futuro leu aya) Bo yiu por skirbi un carta pa e futuro doño di e capsula. Pega un label riba e capsula “No habri prome cu 2020” Sconde e capsula un caminda no frecuenta den cas, p.e. riba un kashi bieu den garashi…

  • Wak un obra teatral of un pelicula basa riba un buki.

Tin obranan teatral y peliculanan apropia pa mucha basa riba buki di mucha. Averigua na e teatronan y cinema local kico tin riba e programa vacacional pa mucha. Tambe por busca DVD y organisa un anochi di pelicula na cas. Recomendabel den tur caso ta, cu abo y bo yiu a lesa e buki prome cu boso a wak e obra of pelicula. Asina boso tin algo pa combersa despues di e funcion: “Kico bo a gusta mas, e buki of e pelicula?” “Con bo ta haña nan a actua den e obra?” “Con abo lo a haci’e?”  

Un contribucion di Fundacion Papiamente.

Fundacion Papiamente tin e tarea pa semper cu por, trece articulonan importante den nos medionan di comunicacion cu por sirbi di guia pa nos mayornan y educadornan. Asina ta spera di por yega na tur esnan cu ta tuma e desaroyo di nos muchanan na serio y kier haci algo significante pa nan futuro y esun di nos pais





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn