1.1 miyon hits pa Aruba Esso News

E Digital Library of the Caribbean (dLOC) ta sigui crece y sostene estudionan Caribense. E website ta provee aceso na mas cu 2 miyon di pagina di contenido y ta registra mas o menos un 1.5 miyon bishita pa luna. E ultimo aña dLOC a agrega casi 160.000 pagina di contenido nobo danki na e sosten di dLOC su partnernan den Caribe, entre otro Biblioteca Nacional Aruba. E prome aporte di Biblioteca Nacional Aruba na e biblioteca digital aki ta Aruba Esso News.  Na e ultimo reunion di ACURIL (Association of Caribbean University Research Institutional Libraries) na Bahamas, a duna reconocimento cu Aruba Esso News a yega 1.1 miyon hits. Un noticia cu ta yena Biblioteca Nacional Aruba, y en especial departamento Arubiana, cu hopi satifaccion. E coleccion di Aruba Esso News digitalisa ta casi completo. Na 2013 cu ayudo di Famia Lake, departamento Arubiana a digitalisa 2 aňa di Esso News cu tabata falta. Ainda falta un par di luna di cuminsamento di aňa 1945.

Ademas di e reconocemento pa loke ta trata Aruba Esso News, a duna reconocemento tambe na algun persona. Digital Library of the Caribbean su exito lo no tabata posibel sin e dedicacion di su partnernan y nan staf. Entre e personanan cu a haya reconocemento ta sra. Graciela Nedd-Cheng, documentalista na Biblioteca Nacional Aruba, trahando den departamento Arubiana. Graciela a ricibi dos certificado, uno como premio di excelencia pa su persistencia y e otro como archivista digital. Biblioteca Nacional ta felicita Graciela cu e bunita reconocimentonan aki.

The Digital Library of the Caribbean (dLOC) ta un cooperativa di biblioteca digital di recursonan relaciona cu e cuenca di Caribe. dLOC ta ofrece acceso na versionnan digitalisa di material cultural, historico y di investigacion tocante Caribe, cu actualmente ta warda den archivonan, bibliotecanan y coleccionnan priva. Por bishita e website riba www.dloc.com .





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn