16 poesia scirbi na Aruba entre 1847-1880: Dia 9 di juni na Archivo Nacional Aruba

Dia 4 di juni señora Ellen Henriquez y señora Diandra Alders a transpasa pa Archivo Nacional Aruba un album di poesia cu ta data di 1847. E album di poesia tabata pertenece na señora Regina Jacomina Croes (1819-1897) y ta contene 16 poesia cu a wordo skirbi na Aruba entre 1847-1880.

Regina Jacomina Croes tabata casa cu e Frances Louis Bazin (1793-1853) cu tabata doño di e plantage “Mon Plaisir”. Despues di e fayecimento di Louis Bazin, Regina Jacomina Croes a casa cu e Italiano Pietro Guiseppe Frigerio. (1823-1863)

E poesia nan a wordo scirbi dor di: Anthony Croes (1847), Constancia Thielen (1847), Louis Bazin (1847), Constancia Thielen (1847), Susanna Maria Schultz(1847), Frederik Bennebroek Gravenhorst (1847), Magdalena S. Croes (1850), Borchard S. Croes (1850), Anna E. van der Biest (1852), Jacob Thielen (1847), Anna E. van der Biest (1852), Pietro Guiseppe Frigerio (1861), persona desconoci (1870), Gerard Evert Zeppenfeldt (1870), persona desconoci (1870), Guiseppina M. Frigerio (1880).       

Señora Ellen Henriquez y Diandra Alders ta tatara y bisa-tatara nieta di Regina Jacomina Croes. Archivo Nacional Aruba ta gradici señora Ellen Henriquez y señora Diandra Alders pa e bunita gesto aki. E album di poesia por wordo admira na Archivo Nacional desde dia 9 di juni  7 ‘or di anochi. Diamars 9 di juni Archivo Nacional ta celebra dia di Archivo y señora Diandra Alders lo duna un presentacion riba e album di poesia. Archivo Nacional Aruba kier a gradici señora Ellen Henriquez y señora Diandra Alders pa asina yudando ANA cu su tarea principal di preserva e historia y herencia cultural di Aruba y pone esaki disponibel pa nos comunidad y futuro generacionnan.

Archivo Nacional Aruba ta extende un invitacion cordial pa bin admira e album di poesia di Regina Jacomina Croes (1819-1897) riba diamars 9 di juni pa 7.00 p.m. pa 9.30 p.m. na unda lo tin un programa special cu diferente lectura y exposicion di cuadra. Riba diaranson 10 di juni y diahuebs 11 di juni por admira e buki di 1.30 p.m. pa 4.00 p.m. paso despues e buki lo wordo restaura dor di e conservator di Archivo Nacional cual lo tuma 1 luna pa keda completa.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn