4 autor local di buki pa mucha ta participa na Festival di buki pa mucha

Biblioteca Nacional Aruba por conta cu participacion di 4 autor local pa e di 22 edicion di Festival di buki pa mucha. Tambe 1 contador di storia y un ilustrador local di buki pa mucha. Ademas tin participacion di autor y contador di storia for di Corsou, Boneiro, Saba, Surnam y Hulanda. Un grupo hopi diverso ta bishita scol otro siman. Apertura di e festival ta diabierna awor dilanti biblioteca na Playa. Muchanan por spera un fiesta grandi.

Un di e autornan local ta sra. Liliana Braamskamp-Erasmus. Liliana a participa na e proyecto aki mas biaha den pasado. Tambe como fundador di Fundacion Papiamente cu tin promocion di lesamento como un di su metanan principal el a aporta na organisacion di e evento aki.

Desde chikito Liliana tabatin un pasion enorme pa skirbi. El a skirbi su prome articulo pa e corant di scol dia e tabatin 6 aña di edad y el a gana su prome premio ‘Brief van de Maand’ (Carta Di Luna) pa e revista di mucha Matinette – dia e tabatin 9 aña di edad. Despues cu el a haci un yamada na e revista infantil Spaño ‘Tú’  Liliana a haya ‘penvrienden en vriendinnen’ na tur parti di mundo. El a ricibi mas cu 100 carta pa siman y e cartero a kere cu Liliana cu ya cu 11 aña tabatin su propio compañia caba.

Liliana su prome buki Rima Rond di Aruba a wordo publica na 2003.   E buki a bira un exito grandi y esey a duna  Liliana mas smaak pa skirbi mas storia pa su lesadonan na Aruba. E ta autora di diferente pakete di poesia, cantica, ‘prentenboek’, programa radial, obra di teatro cortico, pero tambe cuentanan largo, tur esaki na su lenga materno, Papiamento.  Pa e muchanan di Hulanda y Belgica, e ta skirbi buki pa lesa y scucha y pa hende grandi, cuentanan cortico y columna cu historianan cu a pasa di berdad, por ehempel di cuminda, di biaha of di naturalesa.

Na 2012 Liliana su prome ‘thriller’ di mucha ‘De Knijpkat’ a ser publica na e imprenta Delubas. Liliana ta traha cu smaak na diferente proyecto, pero skirbimento ta keda su pasion. Banda di escritora, Liliana ta ilustradora, un lesado progresista tambe  (esey ta un hende cu ta gusta lesa y cu lo gusta si mas hende haci esaki, stima buki.) E ta fundadora hunto cu dos amiga di Fundacion Papiamente (2004), pa asina contagia tur hende na Aruba cu e goso di lesa.

 





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn