4 escritor di buki pa mucha di bishita for di Hulanda

Biblioteca Nacional Aruba den cuadro di su festival anual tin 4 escritor di buki pa mucha di bishita for di Hulanda. Nan ta Evelien van Dort, Mylo Freeman, Sjoerd Kuyper y Tjibbe Veldkamp. Nan ta forma parti di un grupo mas grandi di autor y contado di storia cu ta bishita diferente scol den siman venidero di 5 pa 9 di november. Tambe nan lo topa cu un publico hoben na e librerianan y treimerdia na biblioteca. Tur mucha ta invita pa e fiesta di apertura diabierna awor dilanti biblioteca di 4’or pa 7’or.

Evelien van Dort

Evelien van Dort a skirbi como 40 buki pa mucha den categoria di edad di 3 pa 14 aña. E temanan Naturalesa, Amistad y Bestia ta hunga un rol importante den su storianan pero e ta skirbi buki historico tambe y storianan di muchanan poco special, kizas di mucha cu tin hopi curashi, mucha cu ta pasa den aventura y cu ta siña for di esaki. Pa Evelien ta importante cu buki ta tene e mucha den un gara pasobra e ta bunita y ta tene e mucha den suspenso, pero cu alabes e mucha ta siña algo for di e storia y ta siña conoce su mes mas mihor y por crece. Riba su website por lesa tur cos di su bukinan y por haci pregunta na Evelien. Esaki por yuda pa un boekbespreking na scol. Evelien van Dort ta duna presentacion di buki regularmente na libreria, biblioteca y scol. E ta gusta e interaccion y envolvi mucha den su storianan. Hunto cu e muchanan e ta traha cantica y ta canta hunto. E mes ta guia esaki riba su guitara. E ta biba cu su casa na Gorssel. Nan tin 2 yiu. Su hobbynan ta core cabay, cana y biaha. Pa mas informacion por bishita su website www.evelienvandort.nl

Mylo Freeman

Mylo Freeman a nace na Den Haag di un mayor Hulandes y un mayor Mericano. El a studia na academia di arte. E ta un ilustrador, musico y escritor. Despues cu el a haya su prome yiu el a skirbi e prome buki pa mucha titula ‘Potje!’. El a gana un premio pa su prome buki. Despues di e prome publicacion Mylo Freeman a skirbi mas buki. Den su bukinan bo ta topa cu mucha di diferente origen etnico. E ta purba di duna muchanan aki, bibando den un comunidad di hende blanco, un sentido di balor propio. Asina a sali un buki di un prinses colo scur, prinses Arabella. Un prinses cu un kier. Y despues Mylo Freeman a publica 3 buki mas di prinses Arabella. Tambe a traha un obra teatral basa riba e personahe di prinses Arabella. Den mundo di buki di plachi ainda tin hopi espacio pa buki cu mucha di origen etnico diferente. Asina mucha di diferente color por identifica cu otro. Mas informacion di Mylo na www.mylofreeman.com

Sjoerd Kuyper

Sjoerd Kuyper ta di Amsterdam y a cuminsa skirbi fe tempo cu e tabata chikito. Su prome obra di poesia tabata pa hoben y a keda publica cu su 16 aña. Na 1974 el a stop di studia filosofia y a cuminsa traha fulltime como escritor. Sjoerd Kuyper a publica storia y poesia pa adulto y mas cu 40 buki pa mucha. El a gana hopi premio pa su obranan. Kuyper a skirbi tambe pa producionnan pa television (Max Laadvermogen en De Freules) y scenario pa pelicula pa cual el a gana premio na Hulanda (Het zakmes). Di e novela pa hoben ‘De rode zwaan’ a traha un pelicula na 2001 y esaki a keda nomina pa ‘de Kleine Kinderkast’. Kuyper a skirbi letra pa cantica pa e musical ‘De scheepsjongens van Bontekoe’ y e musical ‘Turks fruit’. E aña aki Sjoerd Kuyper a ricibi e Theo Thijssen-prijs 2012, e premio mas prestigioso na Hulanda pa literatura di mucha y hoben. E ta un premio pa henter su obra.

Mas informacion di Sjoerd Kuyper por haya riba su website  www.sjoerdkuyper.com

Tjibbe Veldkamp

Ta straño cu Tjibbe Veldkamp ta un escritor di buki pa mucha pasobra tempo cu e tabata hoben nunca el a skirbi sikiera un storia. E tabata prefera di hunga pafo. Tempo cu e mester a scohe un profesion e no tabata sa kico pa haci. Ta un hende a dun’e e idea pa skirbi un buki. Tjibbe no a haci caso, pero despues di tempo el a pensa cu kisas e tin cu purba. Binti aña pasa el a cuminsa skirbi y e no a stop. El a skirbi como 20 buki te awor. Tin ora nan ta buki yen di plachi pa mucha chikito, tin ora nan ta pa mucha poco mas grandi pa nan mes lesa, pero Tjibbe su bukinan semper ta un poco loco y pret. Ultimo añanan y ta traha hunto cu Kees de Boer, pasobra Kees por pinta hopi bon. Y Kees tambe ta gusta cos pret y poco loco. Nan ta un bon pareha. Tjibbe a gana hopi premio pa su bukinan. Mas informacion di e escritor aki na www.tjibbeveldkamp.nl

Como cu e tema di e festival di buki pa mucha e aña aki ta multiculturalidad, Biblioteca Nacional Aruba a forma un grupo di escritor, ilustrador y contador di storia hopi diverso y for di diferente pais. Tin un programa atractivo pa muchanan na scol y tambe treimerdia na biblioteca Playa y San Nicolas caminda tur mucha ta bon bini. Tur actividad ta gratis.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn