A boga pa cuido y proteccion di patrimonio cultural bira un prioridad

Directora di Fondo di Monumento, Sra. Anne Witsenburg, Directora di Oficina di Monumento Sra. Yvonne Webb-Kock y Sra. Arminda Franken-Ruiz, encarga cu maneho di Museo Arqueologico Aruba a uni forsa pa trece na atencion di Formador di e Gabinete nobo e importancia pa cuida y proteha e herencia cultural di nos pais.

Como pais Aruba tin un historia rico di miles di aña y e maneho cu ta stipula kico ta proteha y warda pa futuro generacionnan mester ta un refleho di esaki. Oficina di Monumento ta e instancia encarga cu maneho riba e area aki y actualmente tin 33 monumento protehi na Aruba cual nan tur ta monumentonan arquitectonico. Tur 3 instancia a subraya e necesidad pa Oficina di Monumento haya e sosten necesario den forma di personal y medionan pa nan por logra proteha pa medio di e ley existente mas di e herencia cultural. A mustra tambe riba e necesidad pa moderniza e legislacion existente y pa Aruba bira partido den Tratadonan Internacional cu ta regarda cuido y proteccion di patrimonio cultural.

Fondo di Monumento a mustra e rol importante cu e por hunga den haya fondonan pafor di Gobierno pa restaura, cuida y protehe monumentonan. Un rekisito esencial pa haya fondonan internacional ta cu e monumentonan ta protehi segun e Ordenanza di Monumento vigente.

Museo Arqueologico a enfatisa cu e Gabinete nobo tin e oportunidad di bira e prome cu ta declara un sitio arqueologico como un monumento protehi. Mas di 60% di nos herencia mas bieu ta den y riba terenonan y tambe den awanan teritorial. Aruba ta un di e unico paisnan den region di Caribe caminda ainda por scapa e herencia aki. Museo Arqueologico tin un bon documentacion di e sitionan y mester di sosten di Gobierno pa declara esunnan cu mas balor historico como monumentonan protehi.

 E instancianan menciona a subraya tambe e rol importante cu herencia cultural por hunga como atraccion turistico y catalisador di desaroyo economico y social.

 





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn