Algun obra local na 2017

Biblioteca Nacional Aruba tin e tarea pa colecta y warda publicacionnan local di autor y poeta local y tambe publicacionnan cu ta trata Aruba en general. Por lo menos un ehemplar di cada publicacion ta bay den Coleccion nacional na departamento Arubiana y demas ehemplar ta bay den coleccionnan pa consulta y fia na biblioteca central na Playa y sucursal na San Nicolas. Ta duna autor y poeta e oportunidad pa presenta nan obra si nan ta desea esaki. Biblioteca ta stimula actividadnan literario tambe. Na 2017 tabatin diferente publicacion.

Na januari poeta Angelle Stamper a debuta cu su buki di poesia ‘Cicatriz di Mirada’ y a presenta esaki. ‘Cicatriz di Mirada’ ta un album di poesia cu ta contene poema na Papiamento, Ingles, & Hulandes acompaña pa potretnan saca na Aruba saca pa Angelle su mes persona.

Na februari autor Denis Henriquez a presenta su ultimo novela ‘Het sterven van Rebecca Lopez Ikario’. Denis Henriquez ta bon conoci pa su diferente obranan, muy en especial ‘Zuidstraat’.

Na maart columnista Rona Coster a lansa su buki ‘ Island life: Aruba’s best kept diary’. Rona Coster-Kahan ta conoci pa su columnanan ‘Bati bleki’ y tambe Rona ta radioshow hostess di e programa radial ‘Pika’. Rona ta co-fundador di e revista conoci ‘Island temptations’.

Na maart biblioteca a ricibi un publicacion cu ta contene historia di partido politico Movimiento Electoral di Pueblo (MEP) pa e coleccion nacional.

Na april Fundacion Editorial Charuba a presenta den hardin di departamento Arubiana/Caribiana e publicacion “Balans, Arubaans letterkundig leven : De periode van Autonomie en Status Aparte, 1954-2015”. ‘Balans’ ta contene articulonan cu dr. Wim Rutgers a skirbi tocante desaroyo di historia di literatura di Aruba.

Poeta Lily Clarisa Henriquez a skirbi ‘Lost Love Poems’, un coleccion di poema y Lily a presenta su obra na juli. E autor y deportista profesional Jerry Morris, campion den Muay Thai boxing y den Shidokan karate a presenta su autobiografia titula ‘To fail or succeed is a choice’. Na augustus Sr. Romulo Fingal a presenta su buki ‘Ami sin cancer’ den hardin di Arubiana/Caribiana na Bachstraat 5. Sr. Artwell Cain a obsekia directora di Biblioteca Nacional Aruba algun ehemplar di su publicacion ‘A sense of belonging’. Entrega a tuma lugar na september.

Tabatin dos buki pa mucha e aña aki ‘Overal monsters en spoken’ di Liliana Braamskamp-Erasmus hunto cu Jeroen Hoogerwerf y ‘De Griezelkriebel’ di Irmgard Frans. Biblioteca ta percura pa un produccion pa Festival di Buki pa Mucha. Sjoerd Kuyper a skirbi ‘E buki mas excitante di mundo’ y esaki a keda ilustra pa artista visual, Stan Kuiperi.

Por fia of consulta tur e bukinan aki na biblioteca.

For d e diferente cursonan di Skirbimento creativo a sali storianan cortico y poema. Algun a keda publica durante ‘Anochi di storia’ y ‘Poetry showcase’.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn