Angelle Stamper

Recientemente Angelle Stamper a debuta cu su prome coleccion di poema. Angelle actualmente ta studiando na Hulanda. E ta planeando pa haci un presentacion di su buki ‘Cicatriz di mirada’ pa dia 3 di januari na Renaissance Marketplace, 7or di 2017. Pa tal motibo nos a haci un entrevista cortico cu Angelle Stamper…

Bo ta involvi den diferente fase di produccion di bo obra di poesia. Awor bo ta den fase di haci promocion. Con bo ta experiencia esaki?

Promocion ta algo nobo p’ami. Mi ta disfrutando di dje. Dor di haci promocion mi mes ta siña hopi y mi ta compronde otro autor tambe mas. Mi ta haya e oportunidad tambe di conoce diferente hende y instancia nobo. Ta un experiencia interesante y mi ta dispuesto pa siña mas tocante e proceso aki.

Skirbi un poema y declama un poema ta dos cos diferente. Con bo a siña declama?

Prome biaha cu mi a declama pa publico tabata na ‘Arte di Palabra’. Mi a gusta masha hopi mes y esey a motiva mi pa busca diferente oportunidadnan pa practica e ‘arte di declama’. Mi a haya guia di diferente otro poeta y artista cu experiencia den e area di declama dilanti publico. Asina mes mi falta hopi pa siña y desaroya.

Bo ta traha cu texto (poema) y imahen (fotografia). Bo a yega di skirbi un poema basa inspira pa un imahen? Y vice versa bo a yega di traha riba un composicion pa un potret cu ta completa bo poema of ta yama e ambiente dilanti di bo poema?

E poemanan den mi buki “Cicatriz di Mirada” ta acompaña pa potretnan cu mi mes a saca. Pa gran parti ta potretnan cu mi a sinti por representa un poema, pero cu prome cu esey no tabata tin ningun conexion. Den pasado mi a yega di skirbi poema inspira pa imagen den forma di potret of video. Mayoria biaha ta imagen di naturalesa. Tambe pa algun poema den mi buki mi a busca pa compone imagen cu por completa e visualisacion di mi poema. Ehempelnan ta e poemanan “Sero Tolerancia”, “Sinsenshi” y “Drumi mi yiu”

Skirbi un poema ta un manera di procesa bo emocion? Ora un poema ta cla esaki ta trece otro emocion?

Sigur cu skirbi poema ta un medio pa procesa emocionnan cu bo ta sinta cune. Tambe ta un manera pa mustra na e prohimo cu bo por compronde su emocionnan tambe y sinti y biba hunto cu ne. Cada biaha mi lesa un poema di mi mes atrobe pa analisa y adapta, mi ta descubri nificacion y emocionnan nobo cu mi no a nota prome. Esaki ta haci e arte di skirbi un arte bunita.

Ki lugar poesia ta tuma den bo bida? Bo ta skirbi regularmente?

“Poesia ta forma parti di mi existencia y ta yuda mi forma mi identidad cada dia. Pa medio di poesia mi ta purba conecta cu diferente hende. E arte di produci poesia ta un proceso continuo cu hopi espacio pa crece”.

Kico lo bo kier wak otro den mundo literario na Aruba?

“Lo ta bunita si mas hoben y adulto na Aruba por dedica na yuda nos idioma Papiamento y literatura Arubano crece, esta den forma di produccion mes, of den forma di aprecio pa autornan Arubano di temponan prome y awo”.

Kico bo tin en comun cu otro poeta hoben na Aruba?

“Cada poeta na Aruba ta unico, pero nos tur ta traha duro y ta dedica e mas profundo pasion na nos trabou literario. Asina nos tur hunto ta contribui na e crecemento y promocion di e cultura y idioma di nos isla Aruba”.

Angelle Stamper, Oranjestad  november 2016


 

Cicatriz di mirada / Angelle Stamper

Angelle L. Stamper a nace na Aruba na aña 1993. Cu 12 aña Angelle a cuminsa skirbi poesia a base di experencia cu ta conmov’e. Angelle ta debuta cu su obra “Cicatriz di Mirada”; un tomo di poesia cu ta contene 19 poema na Papiamento, 2 poema na Hulandes y 2 na Ingles. Fuera di poema, “Cicatriz di Mirada” ta contene ilustracion den forma di potret cu pa gran parti tambe ta obra di Angelle.

E potretnan ta sea pa compaña y sostene un poema, of pa ofrece e lector un momento di meditacion, reflexion, of sosiego despues di un poema intenso. “Cicatriz di Mirada” ta abarca un periodo di 10 aña cu Angelle ta activo den mundo literario y fotografia. Na varios ocasion Angelle a declama poesia na diferente evento cultural, exposicion di arte y actividad formal tanto na Aruba, Corsou, Hulanda y Alemania. Angelle a participa diferente biaha na e compentencia literario “Arte di Palabra” na Aruba y tambe na “Arte di Palabra ABC” na Corsou.

Na 2010 a cu a bay cu premio di segundo luga pa su poema “Garnachi di Speransa” na Corsou y na 2011 a bay cu premio di prome luga pa su poema “Bo no mag di bay” na Aruba. Na 2011 Angelle tabata un di e 25 hobennan cu haya reconocemento en conexion cu celebracion di 25 aña di Status Aparte, pa medio di exposicion Aruba Dushi Tera “Chikito y simpel bo por ta pero si respeta”. E mesun aña Angelle a presenta su poema “Freedom within” na desvelo di estatua di Anne Frank den Wilhelmina Park, na unda yiu di Martin Luther King Jr., esta Martin Luther King III, e.o. tabata presente.

Actualmente Angelle ta den su di 6 aña di estudio di Medicina na Hulanda. Ta inmenso deseo di Angelle pa “Cicatriz di Mirada” yega na grandi y chikito, inspirando y motivando nan pa reinforsa nan conexion cu Papiamento y literatura en general. Presentacion di buki lo wordo anuncia despues. “Cicatriz di Mirada” ta obtenibel na diferente boekhandel na Aruba, cual ta inclui Bruna, Plaza Bookshop y Dewit Vandorp.

 

 





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn