anochi di informacion pa guianan di crêche

Un grupo grandi di guia di crêche a asisti dialuna anochi dia 22 di september na e encuentro di informacion cu Fundacion Bon Nochi Drumi Dushi a organisa specialmente nan.

Durante e anochi aki e guianan di crêche a haya informacion tocante e proyecto Bon Nochi Drumi Dushi y e diferente actividadnan pa promocion di lesamento cu e fundacion ta organisa.

FBNDD a amplia tambe riba e importancia di lesamento den bida di e mucha y a duna e guianan varios tip pa engrandece nan habilidad di conta storia y tambe e uzo di rima y cantica.

Despues cu Sra. Angele Mac Jannet, colaborado di FBNDD, a habri e programa y a splica loke por a spera di e anochi el a introduci Sra. Rubia Bernabela, vice-presidente di FBNDD, cu a duna un bista amplio di e meta di e fundacion, e actividad y proyectonan cu ta organisa y e importancia di esakinan pa promove lesamento.

Sra. Bernabela a enfatisa riba e importancia di bishita di cas, cu ta e curason di e proyecto y e rol indispensabel cu e boluntario ta hunga den esaki. Sra. ALida Kock, boluntario y lider di Commission Quiz di FBNDD, a tene un presentacion hopi interactivo cu e presentenan. Sra Kock a elabora riba e nificacion di lesamento pa desaroyo di e mucha, principalmente riba e beneficio di e contacto trempan, es decir na edad hopi chikito, di e mucha cu buki y storia.

Na final di e anochi e participantenan a haya un pakete di buki pa nan crèche pa cortesia di Sra. Kock for di su cas publicitario La Kock Publishing.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn