Ariadne Faries ta parti di e festival di buki pa mucha

Biblioteca Nacional Aruba ta organisa su di 21 Festival di Buki pa Mucha den e siman di 1 te cu 8 di november 2013. Escritor y contadonan di cuenta lo ta di bishita den e siman aki na 65 scol Preparatorio, basico y special. Tambe lo tin diferente actividad na librerianan y biblioteca.

Ariadne Faries ta forma parti di e grupo di autor cu ta bishita scol. Ariadne Faries a nace na Corsou (1968) y a studia diseño grafico na San José, Costa Rica. Ariadne su arte ta conoci riba diferente tereno manera: Arte plastico, fotografia, diseño grafico y como ilustrado y autor pa buki di mucha. Den su obranan di literatura pa mucha, su habilidadnan ta cubri gran parti di tur esaki. Ariadne Faries tin varios co-produccion cu otro autor riba su nomber. Por ehempel Kingu di e escritora di Aruba Aurita Meenhorst-Arends.

Kingu ta e buki oficial di festival di buki pa mucha 2006 na Aruba. Tambe ‘Kumbai’ skirbi pa Ruth Zefrin, ‘Mi amigu hundu y rondo’ di Roland Colastica y ‘Yomi ke bai fèlt’ di Merly Augusta. Huntu ku 12 autor Ariadne a crea ‘Bin bin scucha un cuenta’ (2005). Un buki di scochi pa mucha chikito. Diferente buki grandi pa enseñansa di fundeshi manera, ‘Rosi, e konenchi’, ‘Un beer pa Minchi y Mimi a haci aña, bo ta bini?’ (2005). ‘Domi di den Mondi’ di Desiree Correa, buki oficial di festival di buki pa mucha 2003 na Aruba y Antiyas Hulandes. ‘Djosi Djaka cu Mimina Makaku’ di Ruthie Panthoplet (2001). Tambe el a skirbi un buki hunto cu Maria Diwan y Diana Pinto: ‘Gabriela y e simianan di felicidad’ (1999). ‘Un simia’ ta un coleccion di poesia y cuenta cortico skirbi door di varios mucha di Boneiro (1999). Cuenta folkloriko di Enrique Muller (1997). Su mes bukinan cu e mes a skirbi y pinta: ‘Esta dushi Carnaval di cadushi’. (1995) y ‘Di un te dies’ (2011).

Ariadne Faries a participa den exposicion di arte como individual y den grupo na varios pais. Su arte a ser expone na Corsou, Costa Rica, Venezuela, Cuba, Santo Domingo, Aruba, Bonaire, Michigan USA y New York.

Biblioteca Nacional Aruba ta invita tur mucha y publico en general pa ta presente na e apertura di e Fesival di Buki pa Mucha 2013, diabierna prome di november. Biblioteca ta sigui cu e trabou di promocion di lesamento y ta sigui stimula otro instancia cu ta traha riba tereno di lesamento. Biblioteca Nacional Aruba ta e centro di conocemento y encuentro pa e pueblo di Aruba.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn