Artista local Vanessa Paulina a ilustra 2 buki

Vanessa a ilustra 2 buki di e autora Hilli Arduin di Surnam. E escritora di buki pa mucha, Hilli Arduin tabata di bishita na Aruba durante ultimo Festival di Buki pa Mucha. Durante di e bishita aki el a drenta den contacto cu Vanessa Paulina. Titulo di e obranan ta “IK NEEM JE MEE” y “ABOIKONI”. Den e ilustracionnan di Vanessa Paulina e personahenan Akesi, Aboikoni, Boni y Rogier y Selina ta briya cu orguyo y determinacion nan ta hiba e mensahe: Aki mi ta y mi ta sigui! Vanessa tambe a diseña e lay-out di e 2 bukinan aki. E siman aki el a entrega un ehemplar di cada buki na Biblioteca Nacional Aruba.

Vanessa ta un artista visual den disciplinanan di pintamento, ilustracion y diseño di moda.

Vanessa a studia fashion y ilustracion na Willem de Kooning Art Academy na Rotterdam. Prome cu esaki el a studia na Mode Academie Eindhoven y na Windroos Rotterdam, caminda el a gradua como mihor studiante. Pa sostene su esfuersonan artistico el a tuma les tambe di historia di Caribe na Universidad di Leiden y a la vez a hasi diferente curso manera; ‘Business’ na Atlas, Rotterdam, ‘Time management’ y ‘In the picture’, serca Kunstenaars en Co. na Amsterdam .

Vanessa ta traha freelance como stilista y diseñador banda di su pintamento. Vanessa a traha pa diferente revista na Hulanda manera BLVD y Dutch, tambe fashion shows y video clips pa diferente bandanan y pa programanan di television manera e serie ‘Westenwind’ y e show conoci ‘Raymann is laat’. Tambe Vanessa a traha cu dferente gruponan di teatro manera ‘Rotjong’, unda e la disena y traha e trahenan pa 2  obra; ‘Alice’ y ‘Peter pan’  Y alaves e la traha cu stichting ‘Kibra Barera’  na Rotterdam den e producion di ‘Tula be Free’ un presentacion di teatro y baile unda e la hasi e diseño di trahenan, visagie y schmink. Vanessa a duna diferente workshops di pintamento y fashion design, tanto na Aruba y Corsou como na Hulanda , Merca y Surnam.  Pa mas informacion di e artista por bishita www.vanessapaulina.com

Hilli Arduin, escritora di e dos bukinan a nace na Surnam y a lanta na Corsou. E tabata usa su talento pa conta storia den su trabou y semper el a haci esaki cu hopi amor. Arduin tin como 20 aña ta duna presentacion como contador di storia tanto na islanan di Caribe, Hulanda y otro paisnan. E ta purba di uni imagen cu storia den su contamento. E ta laga e muchanan biaha pa otro lugarnan magico pa medio di e storia y e ta haci esaki cu hopi fantasia y expresion di cara y curpa. Arduin a studia diferente tradicion di contamento di storia di diferente cultura. E ta conta storia di mucha, di pueblonan, storianan di religion y e araña Anansi, tambe di temanan di hende muher, placa, morto y amor. Na November 2011 el a publica su buki Prinses Ivana.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn