Artistanan local

Cu mucho gusto nos ta ofrece informacion di artistanan local riba e pagina aki. Tambe por bishita Dept. Arubiana na Bachstraat # 5 pa mas documentacion di artista. Sugerencia ta bon bini.

 


Ryan Oduber ta un artista plastico contemporaneo Arubano. Ryan su trajectoria den Arte ta uno excepcional, Arte Plastico, Pintura,  Architectura, Diseño Grafico, Diseño Interactivo, Documentario y Arte di Video.

El a studia na Sandberg Instituut cu ta e “Master opleiding” di e conocido Academia di Arte, Gerrit Rietveld Academie na Amsterdam. Ryan a gradua como “Master in Fine Arts” na Sandberg Instituut cu specialisacion den Web & Video (Multimedia).  Ryan ta un artista cu a nace pa su idealnan cu a crece den su ideologianan y ta supera y surpasa su mes cu cada proyecto.
Ryan su “eindexamen project” tawata un website interactivo pa muchanan cu a perde un ser keri. E website ta duna e muchanan un plataforma pa yuda compronde y acepta e perdida di e ser keri den un manera creativo.
E muchanan por a traha nan mes un album di potretnan di obhetonan cu ta corda nan riba nan ser keri. Cada potret ta wordo splica dor di e mucha, su mes un bos, su mes un palabranan. Asina e website no solamente ta nan proceso di luto pero ta duna e oportunidad na otro muchanan pa wak cu nan no ta nan so den nan dolor.
Cada potret, storia, ta forma un  retrato grandi cu ta un mosaico bibo cu tur dia ta refleha un otro storia.
E tema aki a haya hopi atencion pa  motibo cu “morto” ainda ta un topico cu ta tabu. Den experiencia di un mucha cu a perde su tata of su mama of un ser keri e website aki ta yudando no solamente e muchanan pero tambe ta wordo usa oficialmente dor un asosacion di profesionalnan den e ramo aki.  Por wak esaki na www.herinnerdingen.nl.

Ryan  a yega di participa na diferente exposicion tambe na Costa Rica “Landings 4” cu ta un  exposicion colectivo di e mihor artistanan hoben di Centro America y  Caribe. Tres biaha Ryan a keda selecta pa representa Aruba den e exposicion “Landings”.
Mas informacion por haña riba  www.landingsproject.com. Mas informacion di Ryan por haya riba  su website www.ryanoduber.com. E ta fundado di www.cultura.tv y hunto cu Leopold Lacle nan a crea un plataforma interactivo di video www.sve.tv

 

 


Vanessa Paulina, artista local a presenta su obranan nobo na 2010 pa medio di un exposicion bao titulo di ‘The language of the eye’ na Westin Gallery. Entre 1990 y 1994 Vanessa a studia fashion y ilustracion na Willem de Kooning Art Academy na Rotterdam. Prome cu esaki el a studia na Mode Academie Eindhoven, di 1989 pa 1990. Na Windroos na Rotterdam, el a gradua como mihor studiante. Pa sostene su esfuerzonan artistico el a tuma les tambe di historia di Caribe na Universidad di Leiden y a la vez un curso Business na Atlas, Rotterdam. Vanessa ta traha freelance como stilista y diseñador banda di su pintamento. Vanessa a traha pa diferente revista na Hulanda manera BLVD y Dutch, tambe fashion shows y video clips pa Hips and Delidel Touch y pa programanan di television manera e serie Westenwind y e show conoci ‘Raymann is laat’. Vanessa a yega di duna diferente workshops di pintamento y fashion design, tanto na Aruba y Corsow como na Hulanda. Mas informacion di e artista por lesa riba www.vanessapaulina.com

 


Elvis Tromp ta un pintor auto-didactico cu un trayectoria largo. El a conoce diferente evolucion den su estilo cu e ta aplica den su creacion. Inicialmente el a bira conoci pa su pintura (sur) realistico atmosferico y te hasta bo por bisa mistico unda cu primordialmente e tabata usa verf di oleo. Den su exposicion 'The Quest' na aña 2005 su transformacion, mas madura, a manifesta su mes mas intenso na momento cu, usando e elementonan basico, esta liña, color y espacio, a logra presenta un coleccion abstracto hopi colorido unda cu ya e uso di verf acrilico tabata domina y e figura reconocibel solamente pa un combinacion di liña y color. Elvis su ultimo exposicion tabata na november 2010. Por lesa mas na http://elvistromp.net

 


Na oktober 2010 Irene Peterson a habri su solo exposicion “Another Journey” na Westin Aruba Art Gallery. E artista Arubiano talentoso aki a studia na e Art Institute of Fort Lauderdale, Florida y despues a sigui su estudio na e Gerrit Rietveld Academy di Amsterdam. El a participa regularmente den exposiocionnan na Aruba, pero tambe na Corsou, Venezuela, Sto. Domingo y Florida. E tema di e exposicion “Another Journey” ta mira naturalesa di Aruba den un lus nobo. “Canando den naturalesa mi ta mire como pa di promer biaha. Kico ta e esencia di tur esaki; e shelo, e tera, y ami. Colornan ta baila den e lus briyante! Lus cu ta cambia e colornan di e paisahe mientras cu e dia ta cambia di salimento di solo pa bahamento di solo.” Tur cos ta papia su propio idioma. Nada no ta keda mescos y tur cos ta keda mescos. Aruba tin hopi joya cu ta chikito pero si bo ta mira nan for di un otro perspectiva e posibilidadnan ta sin fin.

 


Un artista cu un mensahe

'Manera Giolina mes ta bisa: “Den mi arte semper tin un mensahe”.  Y no ta dificil pa haya sa kico ta e mensahe. Ta habri nos mester habri nos mes pa descubri, compronde loke e ta expresa den su poemanan y su pinturanan.
Giolina ta crea cu palabra y e ta forma un mundo den cua e buskeda pa berdad ta domina'. Download 'Giolina Henriquez.doc'

 


Alydia Wever

Alydia a studia danza y musical na ‘Boston Conservatory’. Despues di esaki el a bay bek New York pa studia na Alvin Ailey Dance school. Aya el a presenta entre otro hunto cu Notario Dance Company, Nathan Trice/Rituals. Na 2004 el a presenta su di dos produccion di danza titula ‘Energia Interno’ na Access Art Gallery y Cas di Cultura. Alydia ta coreografo, bailarina profesional y productora, y docente na Scol di Baile Diana Antonette. Na un edad hopi jong Alydia a cuminsa cu su carera den Baile y tambe a sigui desaroya su mes den e arte di teatro y canto. Na juli 2010 Alydia a biaha hunto cu e team di Aruba pa e congreso Internacional IDEA. Pa un demonstracion di Alydia por wak http://www.youtube.com/watch?v=7ec9Rgtmnfg


 

 


Glenda Heyliger
Artista plastico y dunado di forma teatral (Theatervormgeefster)
Glenda a finalisa su estudio na Rietveld Akademie como artista plastico y den theatervormgeving. Glenda a representa Aruba diferente biaha den exterior cu su instalacionnan artistico, e.o. na Cuba y Zuid-Afrika. Na Aruba Glenda a forma parti di diferente exposicion di Arte Plastico. Glenda ta fundado di Atelier SINFA na San Nicolas, caminda el a promove durante diferente aña arte plastico na San Nicolas. Pa mas informacion bishita: www.ryanoduber.com/non-commercial/glenda/index.htm
Opleiding
Koninklijke Academie voor Kunst en Vormgeving (modevormgeving), ’s-Hertogenbosch (1983-1987)
Gerrit Rietveld Academie (modevormgeving), Amsterdam (1987-1988), Atelier '89, Oranjestad, Aruba (1991-1992), Gerrit Rietveld Academie (theatervormgeving), Amsterdam (1992-1996) Download 'Glenda Heyliger NL.doc', Download 'Glenda Heyliger Enge.doc'

 



Diana Antonette
Directora artistico di Scol di Baile
Graduado di e Rotterdamse Dansacademie en Balletstudio Nel Roos na Hulanda, Diana Antonette ta un nomber legendario den mundo di Baile na Aruba, ademas di ta parti di e elenco di Mascaruba. For di 1968 Diana ta comparti su pasion pa baile cu Aruba na e scol di Baile Diana Antonette, y na Colegio Arubano como docente di baile.

 


Belinda de Veer

Belinda ta un artista plastico bon estableci riba e isla. El a nace na Aruba, y el a studia na Merca pa 7 aña, unda el a obtene un doctoral den farmacologia. Despues di su regreso pa e isla, su interes den arte visual y musica a crece y el a sigui varios tayer na Ateliers '89. E tayernan a wordo duna pa maestronan famoso for di e Rietveld Academie na Amsterdam y no a tuma hopi tempo prome cu el a transforma su cas den un atelier y studio di musica, cu suficiente espacio pa su piano stima.
Na oktober di 2012, Belinda a presenta un solo exhibicion titula "Paraiso den Desierto. Un di e piesanan exponi tabata un escultura traha di kabelnan di koper for di e defunto refineria di Valero. E kabelnan di koper tabata entre e varios materialnan recicla cu Belinda a obtene for di e sitio abandona. E escultura, titula "Hardin Encanta", a ricibi su nomber danki na e briyo magico di e koper cora di calidad halto ora cu esaki a wordo ilumina pa e luz di solo. Belinda tambe a faborece e oxidacion berde di koper y e imagen fragil cu e ta proyecta apesar di su durabilidad y forsa. Na honor di su solo exhibicion, Belinda tambe a crea un coleccion di piesanan di joyas creativo y unico di koper pa asina semper recorda e persona cu ta bisti e joyas y colector di arte riba e importancia di cambio y sostenibilidad, cual ta esencial pa e mundo manera nos conoce.
Belinda su joyas di koper ta cuidadosamente traha y acaba cu wax. Mientras cu e creacion di joyas di koper awo ta e tipo di obra preferi di Belinda, e ta trahando tambe riba su musica, studiando cu e pianista Arubiano ganador di premio, Armand Simon.

 


 





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn