Aruba Esso News completo den forma digital

Siman pasa personal di departamento Arubiana di Biblioteca Nacional Aruba tawatin e grato placer di topa cu sr. Albert Lake pa asina entrega bek e ehemplarnan di Aruba Esso News cu a fia di famia Lake. Ta trata aki di e ehemplarnan di december 1940 te cu december 1942. Ehemplarnan cu tawata falta den e coleccion di Arubiana. A digitalisa nan y awor por bisa cu porfin tin e coleccion di Aruba Esso News completamente digitalisa, esta di december 1940 te cu maart 1985.

Un di e tareanan principal di departamento Arubiana/Caribiana ta pa warda, conserva y haci accesibel tur publicacion di Aruba y tocante Aruba. Haciendo esaki ta salvaguardia parti di Aruba su patrimonio nacional y e coleccion ta bira disponibel pa investigadornan, studiantenan y tur otro interesado.

Pa meta di conservacion ta bira necesario pa digitalisa publicacionnan cu ta deteriorando segun tempo ta pasa. Esey ta e caso tambe cu Aruba Esso News. E ta un publicacion sumamente importante cu ta duna un bista di suceso y acontecimento di e refineria, pero tambe riba tereno cultural, social y politico di Aruba den e tempo ey. Den e coleccion di Arubiana tin Aruba Esso News for di 1943 (Vol. 4) te cu maart 1985 (Vol. 47). E coleccion di Arubiana ta digitalisa y ta disponibel riba e website di e biblioteca digital di Caribe, e asina yama Digital Library of the Caribbean (dLOC). Biblioteca Nacional Aruba (BNA) ta partner den e proyecto dLOC. Por bishita e website di dLOC www.dloc.com.

Lastimamente departamento Arubiana no tin Aruba Esso News di e añanan prome cu 1943 (dec. 1940- dec. 1942). Colega Randy Hoek a acerca sr. Albert Lake, ya cu tawata conoci cu e tata di sr. Lake a warda su coleccion di Aruba Esso News. Danki na e cooperacion di Famia Lake cu departamento Arubiana por a digitalisa e numbernan di Aruba Esso News cu tawata falta. Asina cu caba di drecha e scannan den e forma desea, e ta bay pa e biblioteca digital di Caribe.

Na dept. Arubiana nan ta sigur cu nan lo ta di hopi balor pa investigadornan y tur hende cu ta interesa di haya sa algo mas di historia di Aruba. Cu ayudo di famia Lake nos a salvaguardia un coleccion asina importante pa Aruba.

Biblioteca Nacional Aruba ta invita tur hende pa bishita e website www.dloc.com , bay riba ‘partners’ y scoge Biblioteca Nacional Aruba. Ey riba ta haya mas coleccion di revista di Aruba, e.o. e semanario informativo Observador. Di Observador tambe departamento Arubiana falta ehemplar den su coleccion. Ta haci un peticion na kende cu por tin ehemplarnan di e revista si por notifica Lourdes Croes of Graciela Nedd-Cheng na departamento Arubiana, tel. 582-6924, pa asina por fia nan pa digitalisa y evita cu nan ta bay perdi. Por bishita departamento Arubiana tambe na su localidad den Bachstraat 5 na Oranjestad. Un danki na tur persona cu ta contribui na e coleccion Arubiana.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn