Aruba-La Guajira, hermanas unidas y separadas por el mar

Ta un placer pa Fundacion Rancho, cu colaboracion di e conocido linguista Arubiano Ramon Todd Dandaré, invita pueblo di Aruba pa presentacion di e buki “Aruba-La Guajira, hermanas unidas y separadas por el mar”, di autoria di e periodista y investigado cultural Riohachero Fredy González Zubiría. E buki aki ta producto di un trabou di investigacion realisa entre 2013 y 2014, tanto aki na Aruba, unda e autor a entrevista diferente persona di origen Guajiro, como na Colombia.
 

E buki ta haci un recorido door di e historia comparti entre e Departamento di La Guajira na Colombia y e isla di Aruba for di cuminsamento di siglo XX te den añanan setenta, y ta relata algun historia di e bida di e famianan di imigrante cu a integra y a haci aporte significativo na e sociedad Arubiano. Ademas e texto ta un recorido historico door di e relacionnan migratorio y comercial entre ambos teritorio.
 

Tambe e ta un homenahe na tur e homber- y muhenan Guajiro ey cu a crusa lama grandi guia pa un soño en busca di un miho futuro. Ta interesante pa tende di e autor di e buki cu e “ta spera cu e buki aki lo por stimula e afirmacion di e lasonan di fraternidad entre ambos teritorio, cu ta comparti elementonan comun, manera un pasado indigena cercano, e desierto y e vocacion comercial”.
 

Tur hende ta keda invita y lo ta un honor pa Fundacion Rancho y pa Fredy Gonzalez Zubiria pa por conta cu presencia di tur persona interesa, diabierna dia 29 di juli 2016 pa 7or di anochi na Biblioteca Nacional Aruba (BNA) na Playa, George Madurostraat 13.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn