Astrid a conta mil y un storia

Astrid Gietel ta participa na e festival di buki pa mucha di biblioteca como contador di storia. Hunto cu autornan y ilustrador Astrid ta bishita diferente scol basico na Aruba durante un siman largo, pa conta storia den klas. Esaki ta sosode den siman di 3 pa 7 di november. Muchanan cu no ta haya bishita na scol por bay biblioteca trei merdia pa diferente actividad y topa cu autor di buki pa mucha.

Astrid Gietel a baha cu pensioen caba pero cu mucho gusto y entusiasmo e ta participa na e proyecto aki. Conta storia ta algo cu Grietje semper a gusta haci.

For di mucha Astrid kier a bira maestra di scol. Astrid tabata gusta hunga pa maestra, den su weganan, e tabata pone lata di palo, basora y mop contra muraya representando e muchanan di scol y mas cu claro Astrid mes tabata e maestra, cu un linial den su man. Tempo Astrid tabata mucha, su wela semper tabata conta storia mientras cu e tabata strika. Den tur su storianan tabata tin un cantica of un rima pero tur e storianan tabata tin un final tristo. E storianan aki Astrid a usa den e periodo cu e tabata traha na Scol Reina Beatrix pero awor e ta caba e storianan cu un ‘happy ending’.

Trahando na scol Astrid a compone 4 cantica pa e scol por a participa na ‘Voz i Landia’ y eynan su soño a bira realidad ora cu tres di nan a sali den e finalistanan, ‘Mi futuro’, ‘Mi soño’ y ‘Mi ta un mucha chikito’. Tambe el a compone e cantica pa e Festival di Buki pa Mucha na aña 1995 ‘Pandiya di Bestia’. Den su trabou na biblioteca Grietje tabata traha cu mucha, dunando nan informacion di buki, yuda nan cu material y conta storia pa nan na biblioteca y scolnan. Grietje, den su carera largo di maestra di scol y empleado di biblioteca sigur a conta riba mil storia. Nos a perde conteo. Y e ta sigui conta storia.

E festival ta habri diabierna dia 31 di oktober 6or. Den siman di 3 pa 7 di november un grupo di autor, contado di cuenta y ilustrador di diferente pais ta bishita 37 scol basico y 19 scol preparatorio.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn