Aurita Arends

Aurita Arends a nace na Aruba dia 19 di maart 1959. Su carera a cuminsa na Imelda Kleuterschool pasando pa Rosario College y Colegio Arubano. Cu su diploma di H.A.V.O. den man el a subi avion rumbo pa Merca, caminda el a siña pa maestra na Barry University.

Ora cu e dushi bida di studiante a pasa, Aurita a bin bek Aruba pa traha. El a traha prome den restaurant y na stacion di gasolin, te ora cu el a logra haya un trabou den enseñansa. Semper el a para dilanti di klas na e scolnan special, caminda e idioma di instruccion ta Papiamento. Dunando les na Papiamento el a siña mira e bentaha grandi di splica un mucha algo den su mesun idioma materno. Asina Aurita su interes pa sigui studia su idioma crioyo a lanta. E tabata entre e promenan cu a caba e estudio di Papiamento di dos grado na Instituto Pedagogico Arubano.

Actualmente e autor ta trahando na Departamento di Enseñansa, seccion Desaroyo di Curiculo. Aki e ta coordina e trabounan di desaroyo di un metodo di Papiamento pa enseñansa special. Un tempo tambe el a duna les di Papiamento na e adultonan Hulandes cu a bin biba na Aruba.

Den su tempo liber, cu ta hopi scars, e ta hunga canasta, bai cine, skirbi storia y traduci buki. Aurita tin dos yiu homber, Dwayne y Andrew, cu ta centro di su bida. Tin biaha e ta cunsumi cu nan, pero mayoria di biaha e ta adora nan un mundo.

E deseo ferviente di Aurita ta, cu un dia e por mira nos yiunan di tera ricibi nan formacion escolar den e idioma cu nan ta domina. Construi riba un base solido ta forma hende bon para den nan sapato, cu lo por ta mas habri pa mundo y mas capaz pa siña otro idioma tambe. Aurita ta convenci cu scol y siñamento na Papiamento lo ta hopi mas facil y tambe un experiencia mucho mas exitoso pa tur nos muchanan.

Na clausura di e Festival di Buki di Mucha na 2005, a presenta dos buki nobo di Aurita, esta “Talula ta Tover” y e traduccion “Basta Sunchi.” Aurita a skirbi e buki “Kingu” pa e Festival di Buki di Mucha di 2006.

 

 

 





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn