Autor Quito Nicolaas a duna dos tayer interesante

Autor Quito Nicolaas a duna dos workshop na biblioteca e siman aki. Un tayer ‘Con ta skirbi un Biografia’ y un tayer ‘Con ta skirbi un articulo non-fiction’.

Esaki pa esnan cu ta gusta skirbi y ta trahando riba un biografia of autobiografia of un egodocument y ta desea di profundisa nan mes un poco mas den e materia. Sr. Quito Nicolaas a duna guia y tips con pa construi un storia di bida di un persona. Participantenan a duna bon feedback.

Segun Quito Nicolaas e prome workshop “a bay tremendo: tur e participantenan tabata hopi entusiasma cu e materia cu a keda trata y e encargonan cu mester traha ariba. Na final tur hende a bin felicita /gradici mi cu nan a siña masha hopi mes” y di e dos workshop Quito Nicolaas a comenta “den di dos workshop e grupo tabata aun mas participativo”. Nicolaas a gusta e interaccion y preguntanan.

Participante sra. X. tromp ta conta: "Den e workshop di skirbi un (auto) biografia, Quito a pasa dor di e diferente tipo di biografía cu por wordo skirbi, Quito a duna ehempel bibo di bukinan na Papiamento cu ta cualifica como biografía, con pa organisa e buki cu e posibel temanan cu por describi den e buki. Tambe a haya informacion di fuente cu por yuda describi e temporada cu e persona en cuestion a biba, e logística di e entrevista na e persona (si e ta na bida) of su famia y conocirnan. Quito a duna honor na personanan importante den nos comunidad y asina a pasa den basta detaye con pa formula e biografia. E tawata hopi informativo y di hopi ayudo pa esunnan cu ta bay tuma e tarea aki".

"E siguiente workshop a bay over di: 'Con pa skirbi un articulo, columna y/of ensayo', specíficamente tambe carta abierta, remetido y blog. Mi a haya tur dos workshop hopi informativo y agradabel. E workshopnan asina ta motiva un persona cu kier skirbi.​ Tres ora ta bula".

Sr. Quito Nicolaas ta presenta su buki ‘Met Open ogen’ diasabra awor na De Wit/ Van Dorp bookstore di 11or pa 1or di merdia.

P.s. Na 2017 lo tin diferente workshop y curso atrobe riba diferente topico. Keda pendiente. Por ehempel mas curso di Skirbimento creativo cu schrijfcoach Byande van Andel. Registracion ta posibel via info@bibliotecanacional.aw





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn