Ban conoce nos mangelnan

Den cuadro di dia International di Mangel Juli 26, Directie Natuur en Milieu (DNM) a uni forsa cu StimAruba pa asina conhuntamente cu otro organizacionan logra hasi algun programanan radial y na television como tambe un evento cu ta enfoca riba tema “Ban conoce nos mangelnan”.

Na Aruba nos conoce y por aprecia 4 diferente sorto di mangel: Mangel Tam, Mangel Cora/ Mangel Shimaron, Mangel Preto y Fofoti. Esakinan ta matanan costal. Den e siman di 20-26 di juli e grupo a logra pone hunto un siman yena cu programanan y eventonan cu informacion pa nos comunidad. Bishita e pagina social facebook.com/dnmaruba asina por haya mas informacion ariba orarionan.

Ta hopi importante pa comunidad conoce nos mangelnan, kico ta nan contribucion na nos Naturalesa y medio ambiente, ki balor nan tin y mas importante con mester cuida esakinan. StimAruba ta un organisacion cu ta exsisti ya pa añanan y ta pone enfoke ariba e cuido di mata y especienan di Aruba. Pa e ocasion aki ta para keto na e mata cu ta wordo yama Mangel. Y e tarea di DNM ta pa concientisa y educa comunidad y e futuro generacion riba e importancia di nos mangelnan.

Exposicion: entrante awe por bishita Biblioteca Nacional Aruba na playa pa wak e exposicion di diferente literaturanan obtenibel cerca organisacionan y na biblioteca. Bin sera conoci cu e mata di Mangel y mas yerbanan costal.

Bo ta keda invita! Ariba fecha diasabra 25 juli 2015, lo tuma lugar un caminata informativo pa asina abo tambe por conoce nos mangelnan. Evenemento aki ta cuminsa pa 5pm (registración 4:30) na Spaans Lagoen- entrada y parkeo for di Franse Pass (Balashi). E tremendo actividad aki ta organisa pa StimAruba y lo tin un costo di 5 florin cu ta encerca un foyeto educacional ‘Mangelnan ta di gran balor pa nos Medio Ambiente’, un awa di warapa di lamunchi of tamarijn y un snack. Muchanan ta participa gratis. Ta pidi encarecidamente pa trece bo poti reusabel, tambe spuit contra sangura, bisti comfortabel y fresco.

Pelicula na na Parke Nacional Arikok: despues di e caminata 25 di juli  pa 7:30 pm nos ta sigui pa Parke Arikok unda lo pasa un video tocante di nos mangelnan na Aruba y otro video internacional. Entrada ta GRATIS. Bin cu famia henter pa un anochi bou di streanan.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn