Belén Kock-Marchena

Belén Kock-Marchena a nace na Boneiru riba 8 di Juni 1942 y e tin 9 ruman. Na 1948 e famia a muda pa Aruba y te ainda e ta biba na Aruba. Belén y su rumannan muhe a bai Corsou pa sigui MULO eynan. Na 1960 Belén a bin Aruba bek pa sigui cu kweekschool cu a caba di wordo lanta na Aruba. E kier a bira trahador social, pero pa studia pa esey bo mester a bay Hulanda y su mama no tabata kier pa e bayi eynan. Na 1964 Belén a haal su diploma di maestra y a cuminsa traha na Tarcisiuscollege. Despues el a bay Hulanda toch pa studia pa su hoofdakte y ora el a bin bek el a traha un aña na Don Bosco college na San Nicolas y despues el a bay Pius X scol na Dakota unda el a keda traha te ora el a baha cu pensioen.

Belén ta casa cu Dolfi Kock, cu tambe a duna les na scol, y awor tur dos ta pensiona. Nan tin tres yiu homber, dos nuera, cuatro nieta y un nieto.

Banda di duna les Belén ta skirbi poesia. E ta hopi conoci na Aruba. Su poemanan ta directo y emocionante. E ta uza hopi lenguahe expresivo den su poesia. E ta haya e palabra skirbi mes un importante cu e palabra papia. E ta gusta declama. Belén tambe a forma parti di Mascaruba y a participa den programanan cultural na Aruba, Boneiru, Corsou y Hulanda.

Belén tambe ta un contador. Na un manera fascinante y expresivo e ta trece bida den un storia. Pa esey e ta uza e cashi Kamishibai. Su poesia “Juffrouw, ik heb een botèr meebebrengt” a wordo publica na 1986. El a ricibi un premio na Trinidad pa tres di su poesianan. Su poesia “Bo tei... Felicidad?” tabata parti di un buki di poesia di hende muhe di Caribe “Creation Fire” na 1989.

Na 1995 su prome buki di poesia “Vibrashon di Amor” a wordo publica. Na 1997 el a traduci e poesia “De steen bloeit” di Arjen Duinkerk na Papiamento unda e ta yama “E piedra ta floria”. Na 1998 su di dos buki di poesia “Milager/Miracle” a wordo publica, sigui na 2001 cu su di tres buki di poesia  “Den bena di bida/Levensader”. Tambe el a publica un CD cu su poesia “Alimento pa alma”.

Diferente aña caba Belén y Dolfi ta participa den e proyecto “Conta Cuenta” pa hende grandi. E aña aki e pareha ta participa como Wela cu Welo y nan lo purba inspira e muchanan di scol.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn