Belumbe, debut poetico di Diana Lebacs

Diana Lebacs ta hunga un papel determinante den desaroyo di literatura hubenil Hulandes Antiano. E ta skirbi tanto na Hulandes como Papiamentu. Cu ‘Nancho van Bonaire’ (1975), Diana a gana e ‘Gouden Griffel’, un di e premionan mas importante pa literatura hubenil na Hulanda.Na 1994 Diana ta publica su prome novela pa adulto na Hulandes, De langste maand. E tomo di poesia bilingual, Belumbe/Waterlijn (oktober 2014), ta su debut poetico. Diana a skirbi e poesianan originalmente na Hulandes y a traduci nan na Papiamentu.

Diana ta invita e lesado den su laberinto di idioma cu poesia rico na metafora, contraste, contradiccion y paradox. Diana ta uza versonan consiso pa duna forma na su observacionnan, amor, morto, libertad y despedida ta haya bida riba e pagina. Si den e prome ciclo, Bou di liña di awa, e ta sali afo cu expresion intenso, den e di dos ciclo,  pasa di liña di awa, e ta bira den su mes y ta cuminsa medidata.

Den e weekend di 24 y 25 di april 2015, Diana Lebacs lo ta na Aruba riba invitacion di Fundacion Bon Nochi Drumi Dushi pa e ultimo quiz di lesamento pa aña escolar 2014-2015.

FBNDD ta invita amantenan di literatura pa cera conoci un poco mas di cerca cu e poeta Diana Lebacs. Diana lo ta den entrevista cu Tica Basha Abou durante e programa Nos Mainta na Tele Aruba, riba diabierna dia 24 di april.

Riba diasabra 25 di april di 11or pa 2or Diana lo ta na Boekhandel Van Dorp pa firma 'Belumbe' pa interesadonan. Tin un cantidad limita di buki.E hobennan, Raphael Garcia y Yakari Gabriel lo deleita e bishitantenan na Van Dorp cu nan talentonan. Rafael lo presenta su storia ganado di prome premio durante e competencia di Arte di Palabra ABC 2015 na Corsou. Yakari lo declama un di e poemanan di Diana Lebacs.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn