Benefit concert pa yuda talento musical

Carlos Bislip jr. hunto cu coleganan musico ta organisa un ‘Benefit concert’cu musica varia. Esaki ta tuma lugar na Cas di Cultura diasabra dia 16 di augustus y ta cuminsa 8or. Cantantenan cu ta deleita publico ta Vale Croes, Placido Hazel, Rocco Flava y Tommy-Lee Halman. Musiconan ta entre otro Delbert Bernabela (Saxofonista), Franklin Granadillo (Trompet), Angelo Kock (Keyboard), Ivan Quandus (Baho), Lidrick Solognier (Drums y conga), Moises van de L’Isle ( Percussion) y Carlos Bislip (Percussion y dirigente).

Carlos Bislip jr. ta un percussionista y docente di musica na Scol di musica Rufo Wever. Pa hopi aña caba e ta organisa un Free Jazz Concert anual den cuadro di Jazz Appreciation Month na april y tambe casi tur aña e sa organisa un Drum & Percussion camp pa mucha den vakantie grandi. E aña aki e ta organisa un Concierto pa recauda fondo na augustus.

Carlos ta duna les na hopi mucha cu tin talento y cu ta bon motiva y cu ta studia duro. Pero tin biaha ta poco duro pa e mayornan pa paga les di musica. Cu duele den curason ta ripara cu nan mester stop cu les pa motibo di un situacion financiero dificil na cas. Ta organisa e Benefit concert aki pa diferente motibo. Carlos ta desea pa atravez di e concierto aki, crea un concientisacion den nos comunidad cu e situacion aki ta existi  y alabes ta trata na  crea fondo cu lo por yuda mucha cu talento musical pa por sigui tuma les y sigui practica. E Fundacion Donny Lacle pa varios aña caba sa otorga beca na hobennan aki na Aruba cu ta sobresali den un area di musica. Ta den lus di esaki Carlos a dicidi pa aserca e instancia aki como cu e fundacion lo ricibi e fondonan cu lo wordo genera durante di e concierto aki. Consecuentemente e fundacion aki cu lo administra e fondonan anto riba recomendacion di un comittee di maestronan di musica lo otorga beca na hobennan talentoso cu merece mas sosten.

Pa e Benefit concert ta spera cu tur amante di musica y sostenedornan di enseñansa di musica cumpra un carchi pa asisti na e concierto. Por cierto un evento musical cu tur hende, grandi y chikito por disfruta di dje. E benefit concert ta na Cas di Cultura diasabra dia 16 di augustus y carchinan ta solamente 35 florin.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn