Biblioteca Nacional Aruba a presenta e “ National Library of Aruba goes Green Project” na Chicago

Recientemente Biblioteca Nacional Aruba a presenta e “National Library of Aruba goes Green Project!” durante e di 132 conferencia di American Library Association (ALA) na Chicago, Illinois.

E conferencia a tuma lugar den McCormick Convention Center pa 22.000 bibliotecaria di Merca y otro paisnan di rond mundo y a tuma lugar di 27 di juni pa 2 di juli.

E oradonan invita cu a duna e panel presentation na Chicago, Illinois ta: Directora di Biblioteca Nacional Aruba, sra. Astrid Britten, Coordinador Green Education Symposium di Biblioteca Nacional Aruba, sr. Ronny R. Alders, Directora di Philipsburg Jubilee Library y alabes President di Dutch Caribbean Library Association (DCLA), drs. Monique Alberts y planoloog di “Planosfeer” di Breda, Hulanda, drs. Geert Kooistra.

Moderador di e panel presentatie ta sr. Frederick Stoss, un bibliotecario di University at Buffalo na New York. Den pasado sr. Stoss a duna charla na Universidad di Aruba, II Green Aruba Conference y durante e prome Green Education Symposium di Biblioteca Nacional Aruba.

E cuater oradonan invita a biaha pa Chicago, Illinois bao e capa di Dutch Caribbean Library Association (DCLA). E panel presentation a tuma lugar hunto cu un Power Point presentation cu a cai masha na agrado di e bibliotecarionan presente.

Drs. Monique Alberts a elabora con Philispburg Jubilee Library di St. Maarten a caba di instala zonnepanelen ariba e dak di e biblioteca y na unda e gastonan di electricidad lo a baha considerablemente.

Sra. Astrid Britten a duna un splicacion ariba e pakico Biblioteca Nacional Aruba a dicidi pa organisa dos Green Education Symposium na 2012 y 2013. Sra. Britten a splica tambe di e beneficionan cu e studiante y maestronan di Aruba tin pa cu e proyecto inovativo y educativo aki. Tambe sra. Britten a splica e bibliotecarionan presente di Haiti, Merca y Puerto Rico cu ya caba Biblioteca Nacional Aruba ta organisando e di tres simposio educativo conhuntamente cu Santa Rosa. E di tres simposio educativo lo bai focus completamente ariba “Sustainable Food Supplies”. Sra. Britten a splica tambe di e premio internacional di ACURIL cu Biblioteca Nacional Aruba a caba di gana recientemente na Puerto Rico pa e “Green Education Project”!

Sr. Ronny R. Alders a elabora ariba e plataforma di cooperacion cu Biblioteca Nacional Aruba a forma cu differente otro stake holders manera Setar N.V., W.E.B. N.V., N.V. Elmar, Utilities Aruba N.V., Santa Rosa y “Green’s’Cool” pa asina garantisa e exito di e prome y e di dos simposio educativo pa e scolnan secundario y educacion avansa manera Universidad di Aruba, I.P.A., E.P.I y Scol di Polis.

Drs. Kooistra a elabora ariba e rol nobo cu e bibliotecanan na mundo mester tuma pa transforma nan mes den entidadnan hopi mas activo den un mundo cu ta cambiando rapidamente. Drs. Kooistra ta sugeri pa hasi bibliotecanan un lugar di encuentro entre gobiernonan local y otro entidadnan manera por ehempel huisvesting corporaties, makelaars y otro entidadnan importante den nos comunidad.

Dr. Luisa Vigo Cepeda, Executive Secretary di ACURIL a invita e cuater oradonan durante e panel presentatie pa presenta un tool kit di e “Green Education Project” durante e di XLIV conferencia di ACURIL cual lo bai tuma lugar na Bahamas na 2014. E tool kit di e “Green Education Project” lo wordo presenta bou lideragso di sra. Astrid Britten. E tool kit lo wordo usa como modelo pa e otro bibliotecanan den Caribe.

Tambe e cuater oradonan invita a haya un invitacion di un bibliotecaria Mericano pa presenta e “Green Education Project” durante e proximo conferencia di bibliotecanan sostenibel di Association of College and Research Libraries (ACRL) na Portland, Oregon na 2015.

Biblioteca Nacional Aruba ya caba tin un plataforma internacional di cooperacion forma cu ACURIL y IFLA y recientemente Biblioteca Nacional Aruba a forma un plataforma di cooperacion cu ALA! E proximo conferencia di American Library Association (ALA) lo tuma lugar otro aña na Las Vegas.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn