Biblioteca pa baby y chikitin tambe

Biblioteca pa baby y chikitin tambe

Lesamento of mihor bisa, e gozo den lesamento ta nace na cas. Hopi mayor ta kere cu lesamento ta cuminsa na scol, pero realmente lesamento ta cuminsa mas trempan. Por cuminsa lesa/papia cu e baby ora e ta den barica ainda!

Wak un buki hunto cu bo baby, por ta sona straño, pero e ta un bon comienso. Un comienso di hopi aña di comparti cu otro den un dushi ambiente. Ya desde 4 luna por laga un baby sera conoci cu buki, plachi, palabra, sonido. Si un mucha ta lanta den un ambiente caminda buki y lesa ta forma parti di e bida diario, e lo sinti un atraccion pa lesamento mas despues.

Un baby ta demostra interes pa plachi y e bos di su mayornan cu ta conta un cuenta. Cu hopi interes nan por keda wak diferente imagen. Por stimula mucha pa lesa for di chikito caba dor di lesa pa nan. E mihor manera ta pa cuminsa lesa pa un baby y sigui cu e custumber aki. Un mucha ta wak su mayornan y rumannan lesa y sa cu esei ta algo dushi pa hasi. E simiya ta wordo planta na cas. Kier men di cu den e ambiente di cas e goso ta lanta y ta sigui crece.

Hopi hende ta kere cu un mucha por cuminsa bishita biblioteca te ora cu e ta cuminsa bay scol. Pero esei no ta berdad. Por bishita biblioteca for di 0 aña caba, pasobra biblioteca tin buki den su coleccion cu por usa pa lesa pa baby, chikitin y kleuters. Tin buki pa chikitin cu tin hopi ilustracion simpel, cla y alegre cu un baby of chikitin por interpreta bon asina poco poco captando diferente imagen y storia.

Baby por cuminsa hunga cu buki di plastic, despues si e ta un poco mas grandi, buki di tela of buki di carton duro. Despues por cuminsa cu buki di prenchi.

 

Chikitin

Con ta stimula interes pa buki cerca un chikitin? Algun sugerencia:

Tema: Busca buki di cosnan cu e ta gusta. Por ehempel, e ta gusta bestia?, auto? Pero lag'e mes scohe tambe. Si e storia ta mucho largo salta pida.

Ripiticion: Keda lesa storianan bunita di nobo. Mucha chikito ta gusta scucha un storia atrobe. Tambe e ta hasi'e familiar cu e manera con e storia ta hinca den otro. Interactivo: Durante lesamento para un rato, puntra e mucha con e ta kere cu e storia ta bai caba y hasi mas pregunta. Hasi pregunta riba e plachinan cu e ta mira. Laga e mucha bisabo e colornan cu e ta wak. Kizas por laga e mucha pinta loke el a scucha.

Buki ta habri porta pa un mundo di storia, fantasia y bunita imagen.

https://prezi.com/v1dn3osz1uxq/lesamento-ta-duna-placer/

 

 

 

 

 





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn