Biblioteca ta celebra su di dos Lustro contando cuenta na Cas di Anciano

Manera ta custumber ya pa 10 aña caba, Biblioteca Nacional Aruba (BNA) ta tene su actividad pa nos Grandinan “Conta Cuenta na Cas di Anciano”. Durante e tres lunanan, April, Mei y Juni, dos bibliotecaria Olivia Figaroa y Yosmar Sneek, hunto cu e duo di Media Tico Croes y Alex Koolman ta bishita  e tres casnan di Anciano y tambe Cas Marie. Den e forma diferente aki pa promove lesamento y yuda tene nos grandinan socialmente activo.

E aña aki hunto cu e contribucion di Quota Club Aruba, BNA a presenta e siguiente contador di storia. Na April e conocido y kerido pareha autor Dolfi y Belen Kock-Marchena a haci un tremendo presentacion. Unda nan a conta storia di spirito, recita poesia, for di nan propio obranan, canta y hasta balia cu nos Grandinan. Tambe a rifa na cada cas un regalito den cuadro di Pasco Grandi.

Na Mei e autor di e.o. “E Schutter”, Marco Christiaans a deleita cada cas di Anciano cu su bunita storianan di Noord, unda el a crea un ambiente di suspenso pa despues termina den forma agradabel y contando chasco tambe.

Cerando e actividad na Juni, actriz y docente Emerita Emerencia ta haci tur nos Grandinan contento cu su canticanan Africano y storianan e.o. di Fruminga unda nos conocido Chabelita ta hunga un rol importante. Cu su tambu Emerita ta logra pone nos grandinan canta tambe.

E di dos parti di e mainta tabata dos pelicula den e lunanan di April y Mei. Uno den cuadro di celebracion di nos Himno y Bandera y e otro cu ‘Plantacion den cunucu’ como tema. Na Juni e grupo di musica di BNA acompaña pa Nelson Tiel di Archivo Nacional Aruba (ANA), hunto cu Emerita a clausura na cada cas brindando musica crioyo, celebrando asina aki e 10 aña cu cada cas.

Y pa e Clausura di e actividad completo dia 30 di Juni, e famoso amigo di Aruba, Alvin Inecia, cariñosamente yama Tio Ali di Corsou,  a wordo invita pa deleita tur presente hunto cu e grupo musical di BNA y tur participante di aña 2016. Honrando nos Grandinan cu poesia ritmico y tambe musica bailabel, manera ta tipico pa Tio Ali.

Biblioteca Nacional Aruba kier duna danki na Quota Club Aruba y tur participante di 2016 pa haci e actividad pa Cas di Anciano un exito.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn