Biblioteca ta gradici Scol Maria Goretti y St. Paulusschool pa nan tremendo presentacion

Cu ayudo di scol basico MARIA GORRETTI y ST. PAULUSSCHOOL, Festival di buki pa mucha a resulta den un exito. E alumnonan, e maestronan y mayornan di alumnonan di scol Maria Gorretti a percura pa un bunita show di apertura diabierna 1 di november dilanti di Biblioteca Nacional Aruba. Un danki na Tipico Macuarima pa e cantica di e festival.

Durante e apertura cu tabata den e esfera di deporte y wega tambe a hasi nan presentacion e diferente deportista y deportenan cu a destaca na Aruba. Shanaya Howell (bike cross) a bin cu su bycicleta di cross y su medayanan y trofeonan cu el a logra gana durante su competencianan. Sophia y Chiara Petrocchi kendenan a destaca den e deporte di Taekwondo. Federacion di Ahedres y Grupo di Capoeira. Como clausura di e anochi di apertura Dwayne Wever a yama tur autor pa subi escenario y hunto cu tur mucha presente a baila Zumba riba e ritmo di e cantica “Klaar voor de start” di Kinderen voor kinderen.

E alumnonan y e maestronan di ST. PAULUSSCHOOL a percura pa presenta un bunita clausura, diabierna 8 di november. Esaki a tuma lugar na nan propio scol na San Nicolas. Un bunita programa cu a haya hopi elogio di e autornan partcipante. Cu canto y baile di e alumnonan e dos scolnan aki a sa di deleita e publico presente. Dimes e muchanan a haya e oportunidad tambe di tuma despedida di e 13 autornan di e Festival di buki pa mucha, di e aña aki.  Aki tambe  ta manda un danki grandi pa tur alumno, maestro y mayornan di alumnonan di Sint Paulusschool cu a traha duro pa duna un bunita presentacion. Biblioteca Nacional Aruba un biaha mas kier a duna e dos scol nan aki un danki di curason pa nan bunita trabao.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn