Biblioteca ta prepara pa un fiesta grandi

Biblioteca Nacional Aruba ta trece pronto un otro edicion di e Festival di buki pa mucha. Esaki den cuadro di promocion di lesamento. Ta invita autornan local, di Caribe, Hulanda y otro pais pa hunto prepara diferente presentacion pa mucha na scol. Asina e buki y e autor y ilustrador di buki pa mucha ta yega cerca di e mucha y por tin interaccion directo. Esaki por lanta un curiosidad cerca e mucha y e ta un estimulo pa lesa diferente buki. Tur aña ta traha cu un tema, e aña aki  e tema ta ‘Fiesta’.

Apertura di e festival di buki pa mucha ta dia 31 di oktober. Autornan y ilustradornan y contadornan cu ta participa na e proyecto aki ta Gino Vrolijk, Emerita Emerencia, Astrid Gietel, Sheila Werleman, Liliana Braamskamp-Erasmus ( Aruba). Di Corsou ta spera Kathleen Giterson y Tio Ali, for di Saba Tricia Chammaa, for di Boneiro Gabriel Mercera (Tio Gabi), for di Surinam biblioteca ta spera Indra Hu y for di Hulanda ta participa Charlotte Doornhein, Irene Heim y Evelien van Dort. Hunto nan ta bishita e scolnan basico na Aruba pa un siman largo.

Awe nos ta amplia un poco riba e autor Gino Vrolijk. E aña aki e ta participa pa di tres biaha na e festival. Aña pasa Gino a skirbi e buki di e festival.

Gino Vrolijk a nace dia 4 di oktober na aña 1973. El a studia na Instituto Pedagogico Arubano y a termina su estudio na aña 1999. E ta e prome maestro cu a specialisa den e edad di mucha di 4 pa 8 aña. Y di e forma aki a bira e prome meneer di scol preparatorio den e historia di enseñansa di Aruba. Gino Vrolijk a cuminsa traha na Colegio Hilario Angela Basisschool na San Nicolas, e districto na unda el a lanta como mucha. Despues di 4 aña trahando den 1e klas el a traha 4 aña na Departamento di Enseñansa, esta Desaroyo di Curiculo. Eynan el a haci diferente trabou den cuadro di innovacion pa enseñansa primario. Por ehempel traha les pa scol y duna presentacion na maestronan di scol riba e importancia di nos idioma Papiamento den enseñansa. Desde 2008 Gino Vrolijk ta director di Fontein Kleuterschool na Weg Fontein San Nicolas. Marcando historia un bes mas, como e prome meneer cabesante di un scol preparatrio den e historia di enseñansa di Aruba.

‘Sumpi, e wanglo sabi!’, ta e prome buki cu Gino Vrolijk a skirbi. E idea pa e storia a bini ora cu el a corda con e tabata hunga y pasa tempo den e cunucu di su welo. Locual e no por lubida ta e cantidad di bes cu el a trapa riba wanglo. Ay!. Na caminda pa e fiesta grandi / Op weg naar het grote feest ta su di dos buki cu el a skirbi como Regalo di Siman di Buki pa e Festival di Buki di Mucha di Aruba pa aña 2013. Gino su deportenan preferi ta core skateboard y tennis. Su wega preferi ta hunga Playstation y carta. Su hobby ta snorkel y cana distancia largo. Tempo Gino tabata chikito, su wela y su mama tabata cont’e un storia tur anochi prome cu e bay drumi. Y di aki su gusto y interes pa lesamento y buki a cuminsa. Pa Gino Vrolijk conta y/of lesa buki pa muchanan ta masha importante pasobra ta di e forma aki interes pa lesamento ta cuminsa.

Gino Vrolijk ta un di e autornan cu lo bishita diferente klas durante e prome siman di november.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn