Biblioteca ta reintroduci boet na september

Durante vakantie grandi biblioteca ta habri y ta brinda e servicio di presta buki na publico cu un orario adapta. Miembronan di biblioteca cu ainda tin buki na cas di cual nan fecha a vence por entrega nan trankilamente sin preocupa cu mester paga boet. Pero esaki ta cambia na september proximo.

Tur miembro di biblioteca por entrega bukinan cu a fia sin paga boet pasobra biblioteca lo no cobra nada te cu fin di augustus. Biblioteca ta hasi un accion pa por haya tur buki bek pa asina por sigui brinda comunidad e servicio di prestamo di buki na esnan cu mester di informacion. Biblioteca ta spera di por conta riba e cooperacion di tur su miembronan pa entrega buki prome cu fin di augustus. En especial biblioteca ta spera tur studiante di Mavo/Havo/VWO pa entrega nan bukinan di literatura pa otro alumno tambe por lesa nan durante e proximo aña escolar.

Dia 2 di september Biblioteca Nacional Aruba ta reintroduci boet despues di un periodo di 3 aña. Pa motibo cu Biblioteca Nacional Aruba su edificio principal tabata cera na 2011 y 2012, a suspende temporalmente  e modulo den sistema di cobra boet riba buki cu a keda entrega lat.

Awor ta e momento oportuno pa hiba buki bek cu a fia. Y biblioteca cu mucho gusto ta haya tur buki bek. Durante vakantie grandi miembronan kizas por busca tur buki cu tin na cas, cerca jiu, casa, prima, bisiña y entrega nan. Pa stimula y incentiva tur miembro pa trece e buki(nan) bek biblioteca no ta cobra boet te cu fin di augustus. Biblioteca ta spera di por conta riba e cooperacion di tur su miembronan pa entrega buki pronto. Por haci esaki tanto na Playa como na San Nicolas. Despues di e periodo ey lo cuminsa cobra 0.25 cent pa cada dia cu un buki ta laat

Durante vakantie grandi biblioteca na Playa ta habri diaranson anochi te 8or, pero e otro dianan biblioteca ta cera 5or. Biblioteca na San Nicolas ta habri diahuebs te 8or y tur otro dianan te 5or.

Por renoba miembrecia cu ta 1 florin pa mucha, 3 florin pa hoben y 5 florin pa adulto pa aña. Staff y personal di biblioteca ta yama publico un caluroso bon bini. Pa cualkier informacion por yama 582 1580. Haci bo biblioteca un bishita. Tur hende ta bon bini.

 





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn