Bird Wildlife of Aruba

Siman pasa Charuba a invita publico pa un presentacion di buki den centro di San Nicolas. Sr. Greg Peterson a presenta un buki masha bunita mes, titula ‘Bird Wildlife of Aruba’. Un produccion cu hopi informacion di parha na Aruba, naturalesa y mucho mas. Sigur un buki cu su balor educativo y un testimonio di e bunitesa di Aruba su naturalesa. Greg Peterson ta presidente y e motor tras di Aruba Birdlife Conservation. Peterson ta un fotografo di naturalesa, specialisa riba fotografia di parha. E buki ta contene como 400 potret di color di un calidad halto. Esaki ta resultado di trabou di investigacion y sacamento di potret pa hopi aña. Peterson ta bon conoci den comunidad pa ta un protector di naturalesa y parha. Peterson a traha riba e texto hunto cu su señora y den fotografia e por a conta cu su ruman, Albert. E publicacion aki lo ta den coleccion di Biblioteca Nacional Aruba pa lesadornan consulta. 

 


 

Siman pasa departamento Arubiana di Biblioteca Nacional Aruba a haya bishita di sr. Greg Peterson cu a bin entrega un ehemplar di e buki Bird Wildlife of Aruba pa añadi den e Coleccion Nacional di Aruba. Sr. Peterson a wordo compaña pa sr. Ron Smit di LM Publishers y sra. Alice van Romondt di Fundacion Editorial Charuba. Sra. Des Croes, bibliotecaria cu ta maneha e departamento Arubiana, a ricibi e preciosidad di publicacion aki. Un publicacion asina valioso cu tin potret y nomber di 254 tipo di parha cu tin na Aruba. E potretnan ta di Greg Peterson y su ruman Albert Peterson. Texto den e buki ta di Greg y Annette Peterson-Bredie.
Departamento Arubiana ta gradici autornan y otro personanan responsabel pa publicacion di Aruba of tocante Aruba pa percura pa un ehemplar di nan publicacion ta den e Coleccion Nacional di Aruba.

 





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn