Bishita pa Bella y Edwin

Autor y pintor Irmgard Frans a habri un exposicion di su dibuhonan na biblioteca titula “Bella y Edwin … Pia pa ki mi tin bo”. Esaki ta habri pa un y tur y gruponan ta haci uso di e oportunidad como actividad pa vakantie. Awe muchanan di camp di IBISA hunto cu nan guiadornan como tambe un grupo di un Cas di anciano na Oranjestad a bishita e exposicion.

Irmgard a duna e grupo di anciano atencion special y a splica e idea. Ta trata di dibuhonan conoci como cartoons. E exposicion ta consisti di 13 storia na Papiamento cu e figuranan Bella y Edwin. Hunto cu nan amigonan nan ta pasa aventura y pret na un manera inocente y poco ‘mal mucha’. Segun Irmgard Fransen: “ E Expo aki ta pa musta nos hobennan con antes e muchanan tabata hunga usando nan fantasia. Y e bishitante adulto por haya nostalgia pasobra e por reconoce su mes, ruman, famia of amigo/a den e storianan. Den e pinturanan cierto aspectonan ta wordo treci dilanti manera diferente di nos mata y parhanan”.

Irmgard ta describi su mes como un persona cu ta gusta reto y aventura….”Mirando cu e aventuranan y recuerdonan ta hopi, mi a dicidi pa contanan den forma di storia pinta. Atrobe, tumando e curashi pa haci algo, sin tin idea con pa yega na e destino final. Actualmente 13 di e 50 storianan a wordo ilustra. E temanan ta simpel y di caracter gracioso. E meta ta pa trece un sonrisa ariba cara di esnan cu ta bishita e Expo “Bella y Edwin … Pia pa ki mi tin bo”.

E exposicion ta habri durante vakantie grandi pa publico y ta habri durante orario di biblioteca na George Madurostraat 13. Specialmente mucha ta bon bini pa diberti un rato cu e storianan hopi pret. Gruponan interesa pa haya un recorido por yama Irmgard Frans na cell. # 690 0122 of manda un email pa irmgardfrans@hotmail.com





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn