Bon nochi drumi dushi

Fundacion Bon Nochi Drumi Dushi

 

Na ocasion di e traspaso di trono benidero, Oranje Fonds ta organisa e buskeda pa ‘Kroonappels’. Tin tres categoria: Hubentud, Bario y Duna un Man. Bon Nochi Drumi Dushi ta participa na e grandioso accion nacional aki den e categoria promove lesamento. Desde awor por mira e nominacion aki riba www.kroonappels.com bou Aruba.

Den e weekend di votacion riba dianan 15/16/17 di maart, tur hende por vota riba un organisacion y asina duna guia na e pareha protector di Oranje Fonds. E organisacionnan cu tin mas voto ta sigui pa e siguiente tanda. E tres organisacionnan cu finalmente ta sali ganador, ta ricibi e predicado ‘Oranje Fonds Kroonappel’ y cada un ta gana € 50.000,= y un estatua di brons, entrega na nan pa e Rey y Reina nobo. Oranje Fonds ta entrega tur aña ‘Appeltjes van Oranje’ y ta corona di e moda aki organisacionnan social exitoso. Na ocasion di e traspaso di trono di e pareha protector di e Fondo, un edicion special ta wordo organisa. Den henter Reino organisacionnan social por registra nan mes den un di e tres categorianan.

Bon Nochi Drumi Dushi ta un fundacion cu a nace na aña 2007 y ta traha a base di proyectonan cu e meta pa promove lesamento. Un di e organonan mas importante di e proyecto ta e bishitanan na cas unda e boluntario, cu ta pilar di e proyecto, ta bishita e muchanan pa comparti e placer di lesamento cu nan y di es manera aki lanta interes den nan pa lesa buki. Durante e bishita na cas e boluntario ta laga un buki regalo pa e mucha como inicio den e intento di stimula e mucha pa stima buki y lesamento. Durante e trayectoria di existencia Bon Nochi Drumi Dushi a desaroya varios otro manera pa engrandece e promocion di lesamento. Tin tres grabacion di programa di television ta pasa na e canalnan durante dianan di siman y a desaroya 3 dvd cu ta contene storianan graba den diferente scenario. Durante aña nan ta organisa hunto cu Biblioteca Nacional actividadnan den bario, nan ta haci recorido den bus den naturalesa den un forma creativo pa conta cuenta na mucha y ta organisa quiz di buki pa scolnan basico di Aruba. Tambe por wak Bon Nochi Drumi Dushi na actividadnan social manera hacimento di aña di mucha, ricibimento y durante temporada di campamento y nan ta conta storia tambe na creche y otro organisacion pa mucha, tur cu e solo meta di comparti placer di buki cu e mucha.

Bon Nochi Drumi Dushi tin masha hopi proyecto pendiente cu nan ta spera di por realisa si nan por conta cu boso ayudo. Den e weekend di 15,16,17 di maart bo por deposita bo voto riba nan fundacion na www.kroonappels.com y asina yuda nan realisa tur e proyectonan cu sigur ta solamente beneficioso pa Aruba. Nan ta conta cu bo sosten y abo tambe ta bin na remarce pa gana varios premio. ‘Oranje Fonds’ ta sostene iniciativanan social cu placa, conocemento y contacto. Pa aña e ta inverti como € 30 miyon den 8.000 y pico organisacion grandi y chikito. Financiamento pa esaki ta bin di Nationale Postcode Loterij, Lotto, di amigonan y di comercio. Prins van Oranje y Princesa Máxima ta e pareha protector di e Fondo.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn