Buki special pa biblioteca

Sra Zetsia Ponson, Informatiespecialist, na Biblioteca Nacional Aruba a representa biblioteca na un presentacion di buki. Sr. Gaby Illidge pa medio di un carta ta gradici “....mi kier tuma e oportunidad aki pa den nomber di mi famia gradici e presencia di Srta. Zetsia Ponson na e presentacion di mi buki “Mr. Baseball” y e apertura oficial di mi Gabby’s Sport Museum, Diaranson, dia 25 di februari 2015.  Alabes ta gradici Srta. Ponson pa tuma e tempo pa bin accepta e bukinan den nomber di Biblioteca Nacional Aruba y Dept. Arubiana...”

Ademas di ta un baluarte den e deporte di baseball na Aruba, Mr. Baseball tambe ta conoci como un comerciante determina, kende cu hopi pasion a traha pa pusha baseball y otro deportenan padilanti. 

Tabata un honor pa Malta Balashi ta parti di e evento aki como sponsor. E buki, un autobiografia, ta describi e carera y bida di e hungado di baseball, lider y comerciante Gabriel “Mr. Baseball” Illidge. E buki, cu ta hiba e subtitulo “I am a WINNER”, a wordo batisa pa su nieto Jeff-Lee, yiu di Shaul Illidge. E buki ta inclui un CD cu un entrevista cu Boy Antoin di Boneiro a haci algun aña pasa cu Gaby Illidge. 

Jewell, e otro nieta di Illidge, a corta e sinta, asina oficialmente habriendo e museo. E museo ta un trabao di amor, un dedicacion na baseball; e ta un area cu sr. Illidge a planea hunto cu su casa, un maestro di scol pa hopi aña. Sr. Illidge a expresa e deseo di un dia por pone su coleccion den e edificio na otro banda di caminda di Charlie’s Bar, unda cu antes tabata RBC Bank. Esaki ta un luga cu ta mas bisto, tanto pa hende local como turista. 

Den su coleccion, por ehempel, tambe tin un cantidad basta grandi di “pin”, cu ta resultado di hopi aña di biaha cu seleccion di Antias y despues di Aruba so. Durante torneonan internacional semper e hungado y dirigentenan ta hiba e pin di nan pais cu nan pa intercambia cu otro. E obheto di mas bieu den su coleccion ta data di aña 1959, dia cu Illidge a muda pa Corsou pa 4 aña. Durante di su prome aña na Corsou el a sali campeon di bate. Sr. Illidge a expresa hopi palabra di gratitud pa The Tropical Bottling Company y na Wendell Bennet, kende e conoce pa hopi aña y tabata un gran respaldo tur ora cu e tabata acerca e compania pa yuda cu e desaroyo di beisbolistanan hoben y e deporte di baseball en general. 

Sr. Gaby Illidge ta invita un y tur pa bishita e museo cu ta duna un bista di su carera y logronan “Mi portanan semper lo ta habri pa tur esnan cu ta desea di bin bishita mi museo”.

Fuente: www.24ora.com





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn