Bus special pa “Tour cultural”

UNOCA pa di dos aña ta organisa e Tour cultural pa hobennan di 2e klas di scolnan secundario. Aña pasa alrededor di 700 hoben a e oportunidad di cera conoci cu seis diferente instancia cultural den un mainta. Tres dia pa siman, cada dia un otro klas ta subi bus y ta bishita e instancianan.

E instancianan cu ta coopera cu e proyecto aki ta Museo Historico Aruba, Museo Arqeologico Aruba Archivo Nacional Aruba, Departamento Arubiana/Caribiana di Biblioteca Nacional Aruba,  Cas di Cultura y Unoca, Coordinador di e proyecto pa UNOCA ta sra. Margriet Lee-Tromp.

E tour ta duna un bunita oportunidad pa siña conoce e instancianan cultural aki. Nan ta haya di e personal di cada instancia un splicacion di e meta y trabou. Mayoria di e scolnan MAVO ta participa, alabes EPB Oranjestad, San Nicolas y Santa Cruz. E aña aki un grupo di Emma school tambe a participa. Pa hopi hoben ta un prome biaha cu nan ta bishita e instancia. Na scol e hobennan ta traha relato di nan experiencia cu e tour cultural.  E tour ta cuminsa 8 or di mainta y tin un duracion di 3 ora, e ta pa grupo maximo di 40 mucha pa duna e instancianan oportunidad pa duna un bon presentacion. E tour cultural a cuminsa na maart y ta sigui te cu e ultimo siman di scol prome cu vakantie grandi.

E idea ta pa stimula e hobennan pa keda bishita e instancianan den futuro hunto cu famia, of cuotro mucha di scol pa traha riba proyecto. Sigur un iniciativa hopi educativo y util pa e studiantenan. Na departamento Arubiana/ Caribiana nan ta hopi contento di por forma parti di e proyecto. A haci bon uso di e oportunidad pa duna informacion y haci e studiantenan conoci cu e servicio cu ta ofrece na studiantenan y publico en general.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn