Cafe cultural: Conservacion di Herencia Arqueologico sub-aquatico di Aruba

Celebracion Dia Internacional di Museo 2013 hunto cu UNESCO

Museonan rond di mundo ta celebra Dia Internacional di Museo rond di e fecha di 18 di Mei y e aňa aki e tema ta ‘Museums (memory + creativity) = social change’. Museo Arqueologico y UNESCO ta invita comunidad di Aruba pa un Cafe Cultural interesante den e tema aki dia 16 di Mei pa 7’or di anochi na Museo Arqueologico.

Museonan awendia ta expone y proteha nos herencia cultural y pa haci esaki mester a bira inventivo y cultiva e creatividad neccesario. Museonan a evoluciona den organisacionan cu nan presencia y nan accionnan por aporta na cambionan den sociedad den un manera constructivo.

E ‘International Council of Museums’ (ICOM) a estableci Dia Internacional di Museo na aňa 1977 pa asina crea consientizacion publico di e rol di Museonan den desaroyo di sociedad y e aňa aki ICOM ta partner cu UNESCO ‘Memory of the World Programme’ – cu ta celebra su 20 anniversario na 2012 – pa Dia Internacional di Museo 2013. ICOM y ‘Memory of the World’, ta comparti un vision comun pa salvaguardia herencia pa e beneficio di sociedad.

Den e cuadro aki ta cai tambe, banda di e tarea pa preserva nos herencia terestre, e tarea pa salvarguardia nos herencia sub-aquatico. Un tarea pa cual Museo Arqueologico awor tin e sosten di dos ‘divers’ local cu a sigui e curso di UNESCO ‘Underwater Cultural Heritage Foundation Course’ pa Museo Arqueologico.

Explotacion di  tesoronan cultural sub-aquatico ta creciendo y nos herencia bou awa mester di proteccion. UNESCO na 2001 a adopta e convenio pa proteha herencia cultural sub-aquatico, cual ta consisti di un framework legal y reglanan pa proteccion.

Museo Arqueologico y UNESCO ta invita un y tur cu ta interesa den e conservacion y proteccion di nos herencia cultural sub-aquatico pa bin e presentacion cu lo tuma lugar e anochi dia 16 di Mei na Museo Arqueologico na Schelptstraat 42. E Cafe Cultural ta priminti di ta un anochi informativo den un esfera nautico.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn