Calidad di centro di Cuido y Guia di mucha di 0-4 aña na Aruba

Diaranson 9 di maart ta tuma luga presentacion di e investigacion y trabou cu sra. Roslin Kock a haci pa su tesis final pa obtene su Master Social Work na Universidad di Corsou. Titulo di su tesis ta “Kwaliteit kinderopvang op Aruba : Visies van sleutelfiguren”.

Sra. Kock no ta un persona desconoci den e mundo di trabou social na Aruba. E ta un trahado social cu a traha casi 20 aña na departamento di Asuntonan Social. Despues di a obtene e certificado pedagogico didactico na IPA, el a bay traha na Colegio EPI. El a duna curso tambe riba tereno di cuido pa mucha na lidernan di grupo di “Bureau Naschoolse Opvang”. Actualmente e ta trahando na Universidad di Aruba.

Su interes den e trabou di cuido y guia pa mucha a conducie na haci su tesis final tocante e calidad pedagogico den centro di cuido pa mucha entre 0 pa 4 aña na Aruba. E resultadonan di su investigacion  por contribui na desaroya modelo di calidad pedagogico na centronan di cuido pa mucha na Aruba.

Un factor interesante ta cu actualmente tin e concepto di ley pa garantisa y promove calidad den centro di cuido di mucha (Landsverordening kinderopvang) pa trata den Parlamento di Aruba.

Pesey a invita mr. George Croes, director di Departamento di Legislacion y Asuntonan Huridico, pa elabora tocante e ley den concepto aki. Guia di e anochi ta den man di sr. Victor Mathilda.

Un invitacion ta bay na tur interesado pa asisti na e anochi di presentacion cu ta tuma luga diaranson awor dia 9 di maart na departamento Arubiana/Caribiana na Bachstraat 5, Oranjestad, di 7or y mey pa 9 or y mey di anochi. Entrada ta manera semper gratis.

 

 





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn