Cantidad di turista cu ta bishita Museo Arqueologico a subi cu 34 porciento

Cantidad di turista cu ta bishita Museo Arqueologico a subi cu 34 porciento

Aña 2014 tawata uno cu hopi reto pa Museo Arqueologico y alavez uno positivo. Cantidad di bishitante a surpasa 10 mil cu e aspecto resaltante di un incremento den cantidad di bishitante internacional cu mas di 1700 turista. Un encuesta hasi como parti di un pasantia a indica na augustus ultimo cu turistanan ta busca y haya informacion di Museo Arqueologico riba internet ya prome cu nan bishita nos isla. Actualmente Museo ta e atraccion number 1 di Oranjestad riba e popular ‘tripadvisor’.

Ta keda un reto pa encurasha bishitantenan local pa bay conoce e Museo. Mayoria persona local cu bishita Museo, na 2014 mas cu 4000, ta ripiti nan bishita. Bishitantenan nobo ta yega principalmente riba dianan nacional y durante actividadnan special manera por ehempel e aña aki dia di e ‘Paseo Monumental’. Museo mester por dirigi mas fondo y otro medionan pues na su programacion pa e publico local sigur tambe pa alumno y docentenan di scol.

Trabounan di mantencion na e edificio monumental, antiguo cas di famia Ecury den Schelpstraat, ta practicamente cla. Como cu ya e a pasa 7 aña desde cu a cuminsa hasi uso di e facildadnan lo mester dirigi fondo den 2015 pa reemplasa ekiponan manera por ehempel e sistema di airco. Mantencion di tur ekipo ta keda primordial den e tempo binidero si Museo ta desea di sigui hasi e bon impresion riba e bishitante manera e experiencia te awor.

E ultimo lunanan aki Museo a inicia dos trayectoria hopi importante, esta e peticion oficial na Gobierno pa pone e 2 prome sitionan arqueologico riba lista nacional di monumentonan protehi y e acuerdo di colaboracion pa investigacion cientifico cu a firma cu Universidad di Leiden pa medio di e proyecto internacional ‘Nexus 1492’.

Pa e temporada di fiesta nos dilanti Museo lo ta cera dianan 24, 25, 26 y 31 di december 2014 y dia 1 y 2 di januari 2015. Prome dia cu ta habri pues den e aña nobo lo ta diasabra 3 di januari. Pa tur esnan cu ta desea di bishita Museo cu familiar y amigonan cu a bin pasa dianan di fiesta for di exterior ta recorda nan cu exposicion di Museo ta cera solamente dialuna pa publico. Pues si no por bin den siman di 10’or pa 5’or por pasa den weekend entre 10’or y  2’or. Museo Arqueologico ta gradici tur partner, boluntario y demas colaborador pa nan sosten na 2014 y ta desea nan y henter comunidad felis dianan di fiesta y un dichoso 2015.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn