Cathleen Giterson ta yuda stimula lesamento

Na Biblioteca Naciona Aruba nan ta casi cla cu e preparacionnan pa e Festival di buki pa mucha. Cathleen Giterson for di Corsou ta duna su aporte na e festival di mucha y ta bishita diferente scol otro siman pa conta storia. Y na biblioteca San Nicolas tambe lo tin presentacion di Cathleen Giterson diahuebs atardi 3or.

Cathleen ta un escritor, poeta, ilustrador y compositor. E ta gusta tur loke tin di haber cu rima, poesia, cantica, charada y cuenta. For di chikito Cathleen tabata gusta sinta pensa y traha su mes rimanan y su mes ‘novelanan’. E tabatin su personahenan imaginario fiho y tur anochi prome cu drumi e tabata inventa un capitulo di su propio ‘novelanan’. E tabata gusta e ora di bay drumi masha hopi mes pasobra ta esey tabata e ora pa e ‘crea’ su capitulonan cu hopi placer y goso. El a debuta cu su obra literario pa hoben y adulto titula ‘Djis un Pensamentu’. Y a lansa su website www.djisunpensamentu.com.  E siguiente aña el a obtene e Premio UNESCO pa idioma materno Papiamentu 2011 den e categoria profesional. E ta gusta experimenta cu estilonan literario, gusta hunga cu idioma y ta skirbi tocante tur tipo di tema.

Cathleen ta gusta mucha masha y semper ta percura pa ora e skirbi of publica un obra pa mucha, pa e ta agradabel pa e muchanan y cu tin partinan tambe cu ta siña e muchanan algo of cu ta enrikece nan vocabulario na un manera di wega y simpel. Cathleen a studia idioma y literatura Spaño na Universidad di Utrecht y a obtene e grado di doctorandus. Cathleen ta gran amante di naturalesa cu ta un fuente cu ta inspire tur dia y ta gran fanatico di tur tipo di musica. Muchanan cu no ta haya bishita na scol por bay scucha storia di Cathleen na biblioteca San Nicolas diahuebs atardi 3or, dia 6 di november. Tur mucha ta bon bini. Presentacionnan den siman di festival ta completamente gratis.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn