Cathleen Giterson

Cathleen Giterson a nase na Kòrsou i ta un eskritor, poeta, ilustradó i kompositor. E ta gusta tur loke tin di aber ku rima, poesia, kantika, charada i kuenta. For di chikí Cathleen tabata gusta sinta pensa i traha su mes rimanan. I tambe su mes ‘novelanan’. E tabatin su personahenan imaginario fiho i tur anochi promé e drumi e tabata traha/inventá un kapítulo di su propio ‘novelanan’. E tabata gusta ora di bai drumi mashá pasobra ta esei tabata e ora pa e ‘krea’ su kapítulonan ku e mes (su so ku su so, den su mente) tabata sigui ku mashá plaser. For di su 8 aña di edat el a kuminsá skirbi rima i kantika pa mucha. I su plan tabata di saka un grabashon di esakinan for di e momentu ei, pero e plan ei no a logra bira realidat. Na edat di 12 aña el a kuminsá okupá su mes seriamente ku skirbimentu di poesia. Pero semper el a bisa ku e ta skirbi pa su mes i no pa otro. Ku su 15 aña el a kuminsá skirbi diferente tipo di kansion prinsipalmente na ingles. Sinembargo añanan despues, riba insistensia di algun persona, el a disidí na aña 2010 ku porfin a yega ora di publiká algun di e tantísimo poesianan ku e tabatin. El a debutá ku su obra literario pa tiner i adulto titulá Djis un Pensamentu. Kolekshon di poesia i prosa poétiko. Tomo I i a lansa su website www.djisunpensamentu.com, un website ku e lema: un E-magazine pa inspirá, eduká, konsientisá i entretené. E siguiente aña el a optené pa esakinan e prestigioso premio Premio UNESCO pa idioma materno papiamentu 2011 den e kategoria profeshonal. E ta gusta eksperimentá ku estilonan literario, gusta hunga ku idioma i ta skirbi tokante tur tipo di tema.
 

Na 2012 el a partisipá na e Festival Internashonal Literario Krusa Laman. Na 2012 i 2013 el a partisipá komo outor na e Festival di Buki di Mucha di Boekhandel Bruna. Na fin di 2012 el a publiká su di dos buki titulá Arko Iris. 101 rima pa mucha. Na fin di aña 2013 el a saka, komo Tanchi Cathy, e cd titulá Arko Iris. 11 kantika pa mucha.
Cathleen ta gusta mucha mashá i semper ta sòru pa ora e skirbi òf publiká un obra pa mucha, pa banda di ta agradabel pa e muchanan pa e tin partinan tambe ku ta siña e muchanan algu òf ku ta enrikesé nan vokabulario na un manera di wega òf otro maneranan masha simpel. Cathleen a studia idioma i literatura spañó na Universidat di Utrecht i a optené e grado di doctorandus. Despues el a sigui e estudio di formashon di dosente post-doktoral pa optené su promé grado komo dosente. El a huramentá tambe komo traduktor sertifiká di spañó i hulandes. Na 2008 el a sigui un kurso di fotografia i a gana e kompetensia fotográfiko na final di e kurso tambe. Cathleen tin diferente hòbi mas. E ta gusta dediká su mes na e arte di diseño gráfiko, e ta gusta pinta/skèts, e ta gusta obra di man i ta gusta e arte kulinario tambe, entre otro krea su propio resetanan i duna diferente preparashon di kuminda eksistente un buèlta úniko. Cathleen ta kasá ku dos yu. Un yu muhé di 3 aña (Tiarah) i un beibi hòmber (Prince-Gerald). E tin un kachó grandi (Tiny) i tres yu di kachó ku yama Panda (Bear), Teddy (Bear) i Grumpy (Bear). Cathleen ta gran amante di nos naturalesa





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn