Charlotte Doornhein ta bishita scol

Na biblioteca e comision di Festival di buki pa mucha ta den full swing cu e organisacion di e proximo edicion di Festival di buki pa mucha. Den e prome siman di november diferente autor y ilustrador ta bishita scolnan basico y primario pa presenta un buki, conta storia y stimula mucha pa lesa. Charlotte Doornheim a skirbi e buki di siman. Tema pa e festival 2014 ta ‘Fiesta’. Pa cuminsa e proceso di investiga e tema, Charlotte Doornheim a bishita Aruba na cuminsamento di aña. Charlotte a cuminsa su investigacion y preparacion na Museo Arqeologico. E kier a haya inspiracion pa e ‘Fiesta Arubiano’ cu conoce hopi tradicion y ritual. Scolnan ta haya e buki regalo. Clientenan di libreria ta haya e buki hunto cu un compra di 25 florin. http://youtu.be/k-R0a6WWo-M  http://youtu.be/ts0_I8WvOBA

Charlotte Doornheim lo ta na Aruba durante e festival di buki pa mucha y ta bishita diferente scol. Charlotte ta skirbi buki pa mucha, storia cortico y poesia. Haciendo esaki e ta experencia un placer y goso profundo. E ta purba di trece diferente mensahe den su storianan manera libertad, e importancia di placer, para pa bo escohencianan y cana bo propio caminda.

Charlotte Doornhein a nace na Hulanda na Bunnik. Su welonan a introducie den e mundo di storia y literatura Caribense como cu nan a biba na Aruba y Corsou entre 1950 y 1975. Charlotte su mama tambe a biba na Antiyas Hulandes te cu su 18 aña. Na 2006 Charlotte ta bay biba na Corsou cu su famia y su cachonan. Charlotte a bin cu e concepto di e ‘Curaçaose festival de Literaire Tippelzone (pa adulto) y e ‘Literaire Trippelzone’ (pa mucha). Banda di skirbi buki pa mucha e ta miembro di redaccion di Cpost, un revista online hopi colorido pa tur amante di Corsou. E ta miembro di hurado di Poem Express durante e NANA-festival di buki pa mucha anual na Corsou. Na 2011 Charlotte, hunto cu su famia, ta bolbe Hulanda. E ta miembro di Simia Literario (un organisacion di escritornan di Aruba y Corsou na Hulanda) pa tene un relacion estrecho cu e sceno tropical. Bibando 5 aña den Caribe ta influencia su skirbimento. Den su buki ‘Shervison ta deskubrí un tesoro’ (Fundashon pa Planifikashon di Idioma, 2010) un mucha Antiyano ta e caracter principal.

‘Hiep Hiep Hoera, di fiesta cu buki!’, ta e lema di e Festival di Buki pa Mucha 2014. Biblioteca Nacional Aruba ta organisa e Festival di Buki pa Mucha pa promociona lesamento. Ta busca tur forma y medio pa haci lesamento mas agradabel y atractivo pa cada mucha. Pa medio di contamento di storia, presentacion y diferente actividad cu autor y ilustrador ta purba di lanta e interes pa e mundo di buki. Lesamento ta algo esencial pa e desaroyo di un mucha.

http://werkgroepcaraibischeletteren.nl/charlotte-doornhein-auteur/





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn