Coleccion special di buki di Gabriel Garcia Marquez pa Biblioteca

Donacion pa Biblioteca

Consulado di Colombia na Aruba, den nomber di Gobierno Colombiano, recientemente a regala algun coleccion extraordinario di buki di e famoso  escritor Colombiano, Gabriel Garcia Marquez, na Departamento di Relacionan Exterior. Na su turno, Departamento di Relacionnan Exterior a tuma e iniciativa di regala algun di e coleccionnan aki na Colegio Arubano Playa y San Nicolas y tambe na Biblioteca Nacional. Un gesto cu a wordo hopi bon ricibi y aprecia pa e instancianan aki. Asina aki tambe a cumpli cu un di e obhetivonan di e Gobierno Colombiano, esta pa aumenta e accesibilidad na hoben y adulto pa  literatura universal, tanto na Spaño como na Ingles.

Tesoro literario como obseqio di Colombia pa tur isla di Caribe:

Durante e di VI cumbre di hefenan di estado y di gobiernonan di e asociación di Estadonan di Caribe AEC, y como homenaje na e maestro Garcia Marquez, Minister di Relacionnan Exterior di Colombia, Dr. Maria Angela Holguin Cuellar a hasi un promesa cu Colombia lo bai obsequia un colección di buki literario menciona. E coleccion di buki aki, di e famoso escritor, Premio Nobel di Literatura, Gabriel Garcia Marquez, na Spaño y na Ingles, ta di un balor literario inmenso. E escritor, kende a fayece na april di 2014, aki a laga atras un tesoro di obranan literario universal cual a ser traduci den mas di 25 idioma.

Entrega na Biblioteca Nacional Aruba: Ademas di Colegio Arubano Playa y San Nicolas, un donacion di dos coleccion di buki, na Spaño  y Ingles, a ser hasi na Biblioteca Nacional Aruba. Esaki ta pa duna oportunidad pa comunidad en general por tin acceso n’e obranan literario aki di Gabriel Garcia Marquez. Directora di Biblioteca Nacional Aruba, Sra. Astrid Britten, a keda masha encanta di por a ricibi e donacion aki. Departamento di Relacionnan Exterior kier a gradici Gobierno di Colombia pa e tremendo regalo  ricibi y ta spera cu e coleccion di bukinan di e gran escritor y ganador di premio Nobel sea aprecia pa studiante y comunidad en general.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn