Coleccion y servicio

Departamento di adulto
BNA ta ofrece un coleccion pa adulto caminda teenagers y adulto por consulta buki informativo, lectura y literatura na Papiamento, Hulandes, Ingles y Spaño. Tambe tin un coleccion chikito di buki na Aleman y Frances.
Den nos sala di estudio tur hende di 12 aña pariba por sinta lesa trankil. Den sala di estudio bo ta haya un variacion di material, documento, informacion di literatura y enciclopedia.

Pa cualkier informacion tocante nos coleccion por acudi na mesa di informacion.

Departamento di mucha y adolesente
E hubentud tambe por acudi na BNA. Na e departamento di mucha y adolesente bo por haya buki y otro material cu storia y informacion special pa mucha y hoben. E departamento pa mucha tin buki di prenchi, buki di storia, buki informativo. E bukinan ta disponibel na Papiamento, Hulandes, Ingles y Spaño. Pa mas informacion por acudi na mesa di informacion. Pa lesa buki y studia tin un huki special pa studia.

Sala di estudio
E sala di estudio di BNA ta patras den e edificio na e piso abou. Pa haci uso di e espacio aki no ta necesario di ta miembro di biblioteca. Den sala di estudio por studia, lesa revista, consulta y investiga nos coleccion informativo. BNA tin diferente enciclopedia, diccionario, y informacion literario den forma de resumen, reseña y informacion biografico di autornan.
E servicio ta completamente gratuito, cu excepcion di printmento di texto y sacamento di copia.

Coleccion di Revista
Biblioteca ta ofrece un coleccion interesante di revista, tanto pa adulto como pa mucha. Mayoria parti di e coleccion di revista ta den sala di estudio caminda por sinta lesa trankilo. Revista pa mucha ta keda warda na departamento hubenil, y ta warda e revistanan local y di Antiyas y Caribe na Dept. Arubiana.

Mediadienst / Servicio Audiovisual
E servicio di media di BNA ta ocupa su mes cu e produccion audiovisual di material di y tocante di Aruba, tur hende cu ta miembro di BNA por fia material na e servicio di media. Esaki ta ensera cinta di video, seri di dia, cinta di zonido y casette. Docentenan por presta e material aki pa finnan educativo. Tambe e docentenan por presta aperatura manera overheadprojector, diaprojector y screen por nada, si esaki ta pa uso educativo.

BNA ta bin cerca bo
Special pa e muchanan di scol cu no por bini of tin dificultad pa yega BNA tin bibliobus. E bibliobus ta core pasa diferente scol. E tin un coleccion di buki pa hubentud te cu 13 aña. Den e bibliobus tambe hubentud por acudi pa tur informacion y por conta tambe riba un ayudo personal. Si acaso un buki no ta disponibel anto e Bibliobus por trece cu e siguiente buelta. E servicio aki no ta costa nada. Durante e bishitanan na scol ta duna atencion na promocion di lesamento.

Servicio di Prestamo na Hospital Dr. Horacio Oduber
Pa hopi aña caba BNA ta presta pacient na hospital buki y revista pa haci nan estadia den hospital mas comodo. E servicio aki ta den man di mas o menos 10 boluntario. Cada diamars mainta e boluntarionan ta pasa cu nan garoshi yen riba cada piso di hospital. E bukinan cu nan ta usa pa e servicio aki ta hopi biaha donacion of parti di coleccion di biblioteca.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn