Comision di festival di buki pa mucha ta gradici sponsornan

Tur aña na final di october, comienso d november Biblioteca Nacional Aruba ta organisa e festival di buki pa mucha den cooperacion cu otro partnernan y cu sosten di sponsornan. E meta di Festival di Buki ta pa promociona lesamento bou di e muchanan di scolnan preparatorio, basico y special di Aruba. E ta un organisacion cu ta pidi hopi creatividad, bon maneho, input di hopi hende cualifica, hopi energia y recurso. Pa logra un exito, ayudo ta necesario. Esaki lo no ta posibel pa sigui sin sosten di nos sponsornan.

Biblioteca Nacional Aruba ta gradici na prome lugar tur e muchanan, nan mayor y maestronan pa participa cu entusiasmo. Ta un placer pa wak e muchanan gosa. Tambe ta gradici autornan, ilustradornan y contadornan di storia local y for di otro paisnan. Danki na organisadornan y guiadornan, boluntarionan, empleadonan di biblioteca,  Departamento di Enseñansa y Instituto Pedagogico Arubano (IPA).

Un danki di curason pa e vision cerca  e sponsornan RBC Royal Bank (sponsor principal), librerianan DeWit & VanDorp stores, Samson Bookstore, Bruna, Plaza Bookshop y Educar, Kiwanis Club of Palm Beach, Guardian Group y Quota Club, ELMAR N.V., Plus Accountants, Nagico, Stichting Munira. Y por ultimo miembronan di prensa cu a distribui informacion pa e publico y a yuda cu e promocion. Hopi ta esnan cu a duna un man, tabata un honor pa traha hunto, masha danki!

Biblioteca Nacional Aruba ta invita tur mucha y publico en general pa hasi bon uso di e bunita coleccion di buki. Biblioteca ta sigui cu e trabou di promociona lesamento y ta sigui stimula otro instancia cu ta traha riba tereno di promocion di lesamento. Biblioteca Nacional Aruba ta e centro di conocemento y encuentro pa e pueblo di Aruba ta wak atras riba un actividad masha exitoso.

Promocion di lesamento cerca muchanan no ta un actividad mester keda na un Festival di Buki pa mucha solamente sino mester bira mas bien un actividad di famia tambe unda mayornan ta trece nan jiu(nan) biblioteca pa busca buki y lesa hunto cu nan pa nan por ta miho prepara den klas na momento di mester lesa y compronde e materianan cu ta duna scol. Temporada di fin di aña cu fiestanan nos dilanti ta bunita ocasion pa regala e mucha un buki pa lesa of bira membro di biblioteca y presta buki.

Biblioteca hubenil ta habri pa mucha tur dia, dialuna, diaranson y diabierna te 8or di anochi.

 

 





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn