Con pa stimula muchanan lesa mas buki

Skirbi pa: Michella Steenvoorde-Lacle (traduccion)

Kico ta aumenta e chens cu un mucha ta experiencia lectura como algo positivo? Esaki ta depende di varios factor.  

Stichting Lezen ta distingui, a base di estudio científico, 8 factor di exito pa promocion di lectura y di educacion di literatura.

Cuatro di e factornan di influencia tin coneccion cu e espacio cu ta lesa e buki. (leesomgeving)

Tres di e factornan aki ta referi na e manera cu e docente ta stimula lesamento, pues e enfoke didactico.

E factor di exito cu ta contribui na obtene experiencianan positivo di lectura, crea un actitud positivo, y posteriormente fomenta habitonan di lectura y habilidadnan di lectura tin coneccion cu e differentiatie di e diferente nivel di difficultad di e bukinan ofreci na e alumno.

E 8 puntonan di exito ta:

1.    E variacion di buki cu ta ofrece na e mucha (boekenaanbod)

2.    Asistencia profesional (un cuerpo di docente, bibliotecario, ayudante pedagogico)

3.    E ayudo y sosten di e mayornan y amistad

4.    Tempo y atencion di lesa: buscando un lugar tranquilo y un momento tranquilo pa esaki

5.    Voorlezen, tanto den klas como na cas

6.    Vrij lezen

7.    Combersa, medita y elabora riba e buki

8.    Differentiatie

 

1.   Boekenaanbod (Escohencia):

E lectura ta ascende segun e studiante ta conta cu un variedad di material di lectura na su disposicion. E presencia di bukinan den un hogar y tambe na scol y e facilidad di un biblioteca, ta conduci na aumenta e conocimento di bukinan y di e oportunidad pa fomenta e lesamento cerca e hoben. Ta importante conecta e buki cu bida y e nivel di lectura cu e mucha ta domina.

2.   Asistencia profesional:

Pa un mucha desaroya un carera di lectura exitoso e mester di guia di un adulto cu por yude. E adulto aki por funciona manera un coach of guia. Esaki nifica cu den cualkier biblioteca, mediateca mester tin un adulto, sea un docente of un bibliotecaria cu por informa e alumno riba e diferente bukinan presente. Un hende cu por anticipa e gusto di e alumno, pa asina yude haya un buki cu ta pas cu su gusto y nivel. Door di ofrece un buki cu ta pas cune, e alumno lo haya un gana di sigui lesa mas, paso su prome experencia tawata uno positivo.

3.   Mayor, amistadnan cu ta stimula lesamento:

E importancia di buki na cas ta bay man den man cu e papel di stimula di e mayornan. E famia ta e punto di partida di lectura y e desaroyo literario di e muchanan. Mayornan cu ta lesa hopi  buki, ta lees voor, y ta papia di bukinan na cas, tin hopi buki disponibel na cas, ta hiba e lectura mas y mas cerca di nan jiunan.

Y automaticamente ta hasi cu e jiu ta adopta lectura mas den su bida despues y ta exenlencia den su estudionan. Y asina historia ta ripiti su mes. Mayornan tin un mayor impacto pa trese lectura como forma di socializacion di amigonan y  maestronan. E mayornan cu ta promove lectura, ta aumenta e probabilidad cu un mucha ta bira amante di buki. Pa ser exacto 5 biaha mas tanto cu mayornan cu no ta fomenta lectura.

4.   Tempo y atencion pa lesa:

Un lugar trankil y semper buscando e tempo pa keda trankil, sin distraccion externo ta rekisito importante na momento cu un persona kier lesa un buki. Den practica e amante di literatura ta consiente di esaki. E lugar preferipesey mayoria bez ta na cas, riba cama of sinta den sofa. E ora preferi ta den oranan di atardi, despues di trabaonan di dia.

5.   Voorlezen tanto na cas como den klas:

Socializacion di lectura ta cuminsa na momento cu bo ta conta e storia na e  mucha, y ta promove cu ta aparece den e buki. E ta crea un impulso positivo na e experiencia di lectura y ta  stimula conocimento  Y ta di fuerte impulso pa fomenta alfabetizacion. (Yuda e mucha papia). Muchanan entre 0 cu 6 aňa, cu ta haya nan mayornan ta lesa pa nan, ta conta nan un storia, ta crese cu e facilidad di lesa, muy contrario na esunnan cu nan mayornan nunca ta lesa pa nan.  E efecto di e storia cu e mayor ta lesa pa e mucha ta asina impactante cu e ta keda sinti te na momento cu e mucha ta drenta scol secundario. Ya cu e ta posee mas imaginacion, ta papia cu diferente tono di voz, y ta describi su cuentanan cu mucho mas contenido. Un mucha ta siña tene un buki den su man, reconoce letranan y e palabra skirbi ta representa e palabra papia. Contamento di un storia (voorlezen) ta yuda tambe cu e desaroyo di conciencia fonologico, habilidad verbal. Tambe ta percura pa e crecemento di  vocabulario y comprension di historia.

Ademas di lectura, e impacto di e storia conta ta forma e habilidad literario y e  desarroyo social-emocional di e muchanan. Por ser bisa cu bo ta construi e competencia literario di un mucha na momento bo divulga e storianan asina bunita lesa.

Si e mayor y/o docente ta fomenta atencion pa storia di e lectura, e manera di trece dilanti cu picardia, cambiando di tono di voz, e mucha ta haya conocimento di tur loke ta  tension, ta reconoce ficcion y ta namora di literatura.

Ademas e contamento di storia ta contribui na competencia emocional di e mucha y ta permiti pa interactua riba sentimentonan di otro.

6.   Vrij lezen

Vrijlezen kiermen cu na un momento specifico y stipula durante e dagrooster, henter un klas of un grupo den e klas mag di lesa algo cu nan mes a escohe. E por ta un buki pero tambe un articulo den un corant of revista. Despues di lesa nan no tin cu traha un verslag ni un toets, si nan mester conta brevemente over di kico e tawata bay, nan no mester bay dilanti klas pa hasi esaki, nan ta keda sinta na nan lugar y ta conta na un manera informal loke nan a caba di lesa.

Muchanan cu ta wordo permiti pa lesa for di buki di nan escogencia sin tin nodo di traha un boekverslag, ta score halto riba conocimento di e idioma, mihor cu muchanan cu no ta hasi esaki. E efecto beneficioso di lectura liber ta mucho mas fuerte si bo sigui stimula e mucha pa scoge su mesun bukinan.

Programa de lectura gratis online den e caso aki, di mas di un aña di abonnement, ta proporciona casi sin excepcion, e puntuacion mas halto di comprension. Vrij Lezen tambe ta eficaz pa alfabetizacion, pa asina desaroya e vocabulario, y stimula gramatica.

7.   Combersa, medita (reflexiona) y elabora riba e buki

Buki ta implanta marcanan den nos memoria. Nan ta wordo procesa dor di e cerebro cu ta lesa. Papia riba literatura, combersa riba bukinan, sea si esaki ta cu mayornan, amistad of docente, tur tin un efecto positivo. Pesey ta importante pa alenta e mayornan pa discuti riba literatura y opina riba diferente bukinan cu e muchanan. Tambe pa intercambia opinion na momento di conta storia, ta vital den e bida di e mucha. Asina e mayor ta percura pa un impacto positivo den alfabetizacion, y mucho mas ainda si e lectura ta interactivo.

8.   Differentiatie

Un mehoracion gradualmente exitoso den lesamento ta cuminsa cu un asercamento defini.Cuatro aspecto ta hunga un rol: e motivacion pa lesa, e interes y escohencia di genre, e aptitud di e alumno y tambe diferencianan entre mucha muher y mucha homber.

Motivacion pa lesa

Mas un mucha ta motiva pa lesa mas satisfaccion lo e experiencia cu lo yuda su desaroyo den lectura.

Interes y escohencia di genre

E personalidad, carater y identidad di e mucha ta hunga un rol ora di escohe un buki. Ora ta purba motiva y stimula lesamento, mester tene e factornan aki bon na cuenta den enseñansa y na biblioteca. 

Abilidad den lesamento

Con apto un mucha ta den su tecnica y comprendimento di lesamento? Un buki mucho dificil no lo aporta na su mehoransa. Pero un buki mucho facil tampoco lo stimula e mucha pa bira mihor. 

Diferencianan entre mucha muher y mucha homber

For di diferente estudionan por conclui cu tin diferencianan cardinal entre loke un mucha muher ta gusta lesa compara cu loke mucha hombernan ta gusta lesa. Esaki sigur mester tuma den consideracion ora ta stimula lesa.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn