Conferencia Linguistico Internacional na Aruba na augustus 2014

Fundacion Lanta Papiamento ta organisa Conferencia di SCL 2014 na Aruba. Esaki lo ta e di 20 Conferencia Bienal di SCL y lo tuma luga na Holiday Inn Resort na Aruba di dia 5 pa dia 8 di augustus 2014.

E tema principal di e Conferencia ta The Caribbean Today: Language Awareness and Language Development (Caribe awe: Consenshi Linguistico y Desaroyo di Lenga). E organisadornan ta haci un peticion na tur linguista di Caribe y personanan interesa rond mundo pa manda nan resumen tratando un tema tocante cualke sorto di lenga di Caribe: lenga Pidgin, lenga papia y lenga di seña, lenga Amerindio (Indjan), lenga Crioyo, tur variedad di lenga standarisa, lenga oficial y lenga no-standarisa, lenga di inmigrante, lenga di herencia historico, lenga den peliger di extincion y lenga religioso y ritual. Ta invita particularmente pa manda tur sorto di resumen perteneciente na temanan y situacionnan linguistico di Aruba, Boneiro y Corsou cu un enfoke particular riba Papiamento (den cualke subdisciplina linguistico).

Fundacion Lanta Papiamento (FLP) ta anfitrion na Aruba di e conferencia di Society for Caribbean Linguistics (SCL) y TA organisa ESAKI conhuntamente cu Society for Pidgin and Creole Linguistics (SPCL) y Associação de Crioulos de Base Lexical Portuguesa e Espanhola (ACBLPE).

Meta di e Conferencianan Bienal di SCL

E metanan di SCL ta di promove estudio di idioma cu un enfoke special riba Caribe y envolve hende interesa di tur parti di mundo. Tur investigacion y publicacion di e miembronan di SCL semper tabata dirigi riba linguistica teoretico y aplica cu un atencion creciente pa e papel y desaroyo di idioma den educacion den Caribe. Nan ta investiga e idiomanan di Caribe di tur origen y epoca, incluso e idiomanan Indjan for di epoca precolombino y e idiomanan di e epoca colonial tanto Europeo, Africano como Asiatico y specialmente e idiomanan Crioyo Caribense.

Por considera e miembronan di SCL pionero riba tereno di reconocemento y estudio di e idiomanan crioyo aki. SCL, pues, ta enfoca riba estudio di e idiomanan y e situacion di idioma di e teritorionan insular y continental di Caribe y otro teritorio cu laso historico y actual cu Caribe. Ta haci investigacion tambe di idioma di comunidad di origen Caribense rond mundo. SCL ta invita y encurasha academico, studiante, educador, escritor y publico general pa participa na su conferencianan. Na e conferencianan aki por participa na charla, tayer, presentacion di poster y presentacion plenario. Y semper tin oportunidad amplio pa participa den discusion linguistico.

Pa nos pais Aruba esaki ta un oportunidad grandi pa presenta na mundo loke nos a logra den e ultimo añanan y pa adkiri mas conocemento y contacto, loke ta asina importante den e fase di desaroyo cu nos ta aden.

Programa tentativo

Ta claro cu na e momento aki e programa ta tentativo. Aworaki e participantenan ta entregando nan resumen. Banda di 15 di april lo por tin un bista mas cla di e programa. En todo caso por bisa for di awor cu e presentacionnan lo ta bale la pena. Nos tin diferente orador principal, esta Dr. Mervyn Alleyne di Jamaica, Dr. Manuel Veiga di Cabo Verde, Dr. Marta Dijkhoff  y Dr. Ronald Severing di Corsou, y Ramon Todd Dandaré Mag. Ling. di Aruba. Importante pa menciona ta cu na e conferencia lo tin un Sala di Papiamento, na unda lo tin un programa special relaciona cu Papiamento. Lo enfoca aki riba idioma Papiamento, su historia, su literatura y otro expresionnan artistico, su luga y papel den enseñansa y den comunidad. Fundacion Lanta Papiamento ta invita en particular tur linguista, educador y studiante di idioma, y en general tur otro persona interesa di Aruba, Boneiro y Corsou pa participa na e Conferencia Linguistico importante aki cu lo tuma luga di 5 pa 8 di augustus 2014 aki na Aruba.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn