Conmemoracion di 150 aña di Abolicion di Sclavitud

Prome di juli 2013 reino henter lo para keto pa asina conmemora e di 150 aña di abolicion di sclavitud. Riba 30 di september 1862 a publica e ley di abolicion cu Rey Willem III a firma, dunando asina na tur catibo libertad entrante 1 di juli 1863. Cu esaki tambe a bin un fin na sclavitud cu ta wordo sosteni dor di un estado. Despues di e rebelionnan di catibo den fin di siglo 18 a bin mas resistencia contra sclavitud. Inglatera a aboli sclavitud na aña 1833. Mientras cu negoshi di catibo a keda aboli na 1814, ta tarda casi 50 aña pa e catibonan den e colonianan Hulandes recobra nan libertad. Kiermen cu Hulanda tabata un di e paisnan cu mas a tarda pa aboli esaki.

Apesar cu hopi biaha nos ta pensa cu Aruba no a conoce sclavitud, indudablemente esaki tabata e caso. Na momento di abolicion di sclavitud nos poblacion tabata consisti di alrededor di 20% cu tabata tin e status di esclavo. Nos por mira e influencia tambe di sclavitud, den nos hendenan, den nos Papiamento, den nos cuminda, den nos musica y den nos cultura en general. Esaki nos por concidera como nos herencia.

P’esey dialuna awor, riba 1 di juli 2013, Fundacion Amigonan di Archivo, Fundacion Lanta Papiamento, Departamento di Cultura, Biblioteca Nacional y Archivo Nacional ta uni forsa pa presenta un anochi informativo pa asina conhuntamente nos conmemora e echo aki.

Lo haci presentacion:

Rosa Arends MA: Presentacion di manuscrito “Registro di Catibonan pa wordo libera na 1863.”

Ramon Todd Danderé Mag. Ling.: Sclavitud y Papiamento.

Dr. Luc Alofs: Kind van de Rekening: Kinderen in slavernij op Aruba.

Gregory Richardson MSc: Slavery and identification on Aruba: the case of San Nicolas.

Ademas lo tin actuacion di:

Emerita Emerencia MA cu un presentacion dramatico y Gwendy Sneek cu un poema di Munye Oduber-Winklaar, regardando e tema di e anochi. Y tambe lo tin presentacion musical di Grupo di Tambu Sodo y Cuero y di Asociacion Coral Ars Nova.

E anochi aki ta wordo teni na Biblioteca Nacional Aruba, George Madurostraat y ta cuminsa pa 8 or di anochi.

E organisadornan di e anochi aki ta spera di por duna un aporte na conocemento di nos historia y cultura por medio di e presentacion aki y alaves conscientisa nos comunidad di un fenomeno tristo, cu semper a y ta core manera un liña cora den historia di humanidad. Mientras cu den Caribe nos a conoce e fenomeno aki desde epoca Indjan, sigui pa esun colonial, mundo ya den e temponan prome cu Cristo tabatin di haber cu e fenomeno aki, di conkista hende pa subordina nan como catibo na e potencia conkistador.

Mientras cu den nos mundo moderno e nacionnan ya no ta permiti ningun forma di sclavitud, ainda tin hopi cu ta sufri bou di loke nos ta yama sclavitud moderno. Djis pensa riba labor di mucha, trabou barata (“Cheap Labor”) y traficacion di hende muhe.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn