Conoce e Monumentonan Mas Antiguo

Bishita sitionan arqueologico den bus of cu bo mes un auto como parti di e luna dedica na monumentonan.  Museo Arqueologico hunto cu otro organisacion ta organisa un bishita na sitionan arqueologico riba nos isla. Segun e ley cu ta reglamenta kico ta un ‘monumento’, esta e ‘Ordenanza di Monumento’ un monumento ta un obheto, edificio, tereno of area cu ta mas cu 50 aña bieu y cu ta di balor estetico, cientifico, historico y etnologico pa nos pais. Debi na e historia rico di nos isla e definicion aki ta haci cu sitionan arqueologico ta e monumentonan mas antiguo di Aruba, ya cu nan ta contene obhetonan y informacion  di gran balor historico, cientifico y etnografico cualnan ta refleha cu e historia di nos poblacion a cuminsa mas di 4000 aña pasa. 

Diadomingo dia 28 di september, Museo Arqueologico ta facilita 2 bus pa transporta esnan cu ta desea di conoce y haya sa mas di e sitionan aki. Saliendo pa 10’or di mainta for di Museo na Schelpstraat, cada bus lo bishita e sitionan di Arashi y Ayo. Un bus lo bishita Cunucu Arikok situa den nos Parke Nacional Arikok, mientras cu e otro lo incorpora un bishita na e cueba di Fontein, tambe ubica den Parke. Entre 10’or di mainta pa 2’or di atardi lo tin arqueologo, asistente di arqueologo y demas personal y boluntario di Museo na cada un di e sitionan aki pa splica tur bishitante tocante esakinan. Esnan cu ta desea esaki, por forma nan grupo di famia y amigo y bishita e sitionan aki cu nan propio transporte.

Entrada ta gratis pa esnan cu ta bishita e sitionan den Parke riba e dia aki! Pa personanan cu ta desea di haci uso di e busnan cu Museo lo pone disponibel, e tour lo ta gratis, pero mester registra di antemano na Museo Arqueologico. Tur hende mester trece nan propio bebida y cuminda. E tour lo dura te alrededor di 2 ora y lo por haci uso di facilidadnan di baño na e sitionan aki. Participantenan di e tour cu ta bishita Cunuco Arikok, mester bin cu bon sapato y mester ta den condicion pa cana di e “visitors’ center” di Parke Nacional pa e cunucu y bek, un trayecto di mas of menos 1 ora. E busnan lo sali pa 10’or di mainta en punto y ta carga un maximo di 40 persona cada un, pues yega trempan pa sigura bo lugar. Pa mas informacion por bishita e pagina di Facebook di Museo: Archeo Aruba y National Archaeological Museum Aruba. Pa registra por yama telefon 582-8979. 





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn