Conseho pa digitalisacion

Dialuna mainta a tuma luga entrega di e rapport di e institucion ‘Beeld en Geluid’ na Hulanda. Representantenan di Beeld en Geluid tabata na Aruba luna pasa pa duna Biblioteca Nacional Aruba conseho tocante preservacion di materialnan cu balor historico cu ta forma parti di e coleccion nacional. 

Manera conoci Departamento Arubiana y Servicio Audiovisual di Biblioteca Nacional Aruba tin coleccionnan grandi riba topiconan interesante manera Lago, documentonan di Hartog, filmnan di tempo di STICUSA y mucho mas. Hopi di e documentonan ta na peliger pa bay perdi y den e proceso pa busca e miho forma pa salvaguardia nan biblioteca a pidi conseho di “Beeld en Geluid”.

Representantenan di e organisacion aki a bin Aruba pa duna conseho con pa remedia e situacion y con pa preserva diferente material. Durante di nan estadia a organisa un workshop na Dept. Arubiana, pa cual a invita tambe TeleAruba, Archivo Nacional Aruba (ANA) y Directie Cultuur. Durante di e tayer hopi informacion interesante a bin dilanti. E siguiente paso ta pa organisa asuntonan internamente y crea un comision di trabao. Dialuna mainta representante di Minister Michelle  Hooyboer-Winklaar, sra. Alice van Romondt a ricibi e rapport traha pa “Beeld en Geluid”.

Di parti di ministerio a repasa e documento y a bin na e conclusion cu Aruba ta riba bon caminda y tin espacio y oportunidadnan pa realisa hopi na bienestar di herencia cultural di Aruba. Riba e foto: Lilian Semeleer, Alice van Romondt, Des Croes, Peter Scholing y Ryan Oduber.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn